Fevralın 7-də keçiriləcək növbədənkənar prezident seçkilərini izləmək istəyən beynəlxalq müşahidəçilərin sayı durmadan artır. Xarici İşlər Nazirliyinin Mətbuat Xidməti İdarəsindən verilən məlumata görə, beynəlxalq müşahidəçi qismində iştirak etmək üçün rəsmi nota göndərilən beynəlxalq təşkilatların əksəriyyəti müsbət cavab verib.
Məlumatda bildirilir ki, XİN tərəfindən ATƏT-in Demokratik Təsisatlar və İnsan Hüquqları Bürosuna, Müstəqil Dövlətlər Birliyinə, İslam Əməkdaşlıq Təşkilatı, Şanxay Əməkdaşlıq Təşkilatına, Demokratiya və İqtisadi İnkişaf naminə Təşkilata (GUAM), Türk Dövlətləri Təşkilatına və Qoşulmama Hərəkatının Gənclər Təşkilatına dəvət məqsədilə müvafiq notalar göndərilib. Mövcud prosedura əsasən həmin təşkilatlar üzv dövlətlərə müraciət edərək müvafiq ölkədəki seçkiləri izləməyə çağırılırlar. Dəvət göndərilən təşkilatların əksəriyyəti seçkilərə müşahidəçi göndərəcəyinə razılıq verib.
Növbədənkənar president seçkilərini izləmək məqsədilə dünyanın aparııcı medialarından da çoxsaylı müraciətlər daxil olub. Akkreditasiya prosesi yekunlaşdıqdan sonra onların dəqiq sayı barədə məlumat veriləcək.
Əliqismət BƏDƏLOV
XQ