Masallı rayonunda məntəqə seçki komissiyalarının üzvlərinin maarifləndirilməsi üçün treninqlər davam edir. Treninqlərin keçirilməsində əsas məqsəd onların bilik, bacarıq və peşəkar vərdişlərinin gücləndirilməsidir.
Bununla yanaşı, seçkilərə hazırlıq, seçkilərin keçirilməsi, məntəqə seçki komissiyalarının fəaliyyətlərinin təşkili də qarşıya qoyulmuş prioritet vəzifələrdəndir. Gün ərzində iki dəfə keçirilən treninq zamanı seçki günü məntəqə seçki komissiyaları üzvlərinin rolu və vəzifələri, səslərin hesablanmasına hazırlıq, seçki bülletenlərinin təsnifatı, yekun protokolun doldurulması və digər mövzularda müzakirələr aparılır. Aşağı seçki komissiyasının üzvlərini maraqlandıran suallar cavablandırılır.
Maarifləndirmə proqramına uyğun keçirilən treninqlər zamanı, həmçinin səsvermə proseslərinə dair praktiki tapşırıqlar da icra edilir. Tədbirin bütün iştirakçılarına təlimlərdə istifadə etmək və yaxından tanış olmaq üçün MSK tərəfindən hazırlanan “Seçki günü üçün yaddaş” kitabçası, səsvermənin nəticələri haqqında protokol nümunəsi, bir sıra digər zəruri material və vəsaitlər verilir.
Əliqismət BƏDƏLOV
XQ