Fevralın 7-nə təyin edilmiş növbədənkənar Azərbaycan Respublikası Prezidenti seçkiləri ilə əlaqədar maarifləndirmə proqramı çərçivəsində tədbirlər bütün ölkə üzrə davam edir. Yanvarın 19-da 21 saylı Nəsimi-Binəqədi seçki dairəsinin məntəqə seçki komissiyalarının sədr, katib və üzvləri üçün treninqlər təşkil edilib. Treninqlərdə əsas məqsəd aşağı seçki komissiyaları üzvlərinin bilik və peşəkarlığını artırmaqdır. Treninqi 21 saylı Nəsimi-Binəqədi seçki dairəsinin dairə seçki komissiyasının sədri Çingiz Dadaşov və dairənin üzvü Leyla Həşimova aparırlar.
Treninqlər zamanı MSK tərəfindən hazırlanmış slaydların və əyani vəsaitlərin köməyi ilə iştirakçılara səsvermə günü məntəqə seçki komissiyaları üzvlərinin rol və vəzifələri, qarşılaşdıqları problemlərdən çıxış yolu barədə məlumat verilib. Bununla yanaşı, səsvermə otağının təşkil edilməsi qaydası, seçki günü müşahidəçilərin hüquqları, məntəqənin açılması, səsvermə ilə bağlı məlumatların verilməsi saatları da diqqətə çatdırılıb. Təlim iştirakçıları, eyni zamanda, səsvermədə iştirak edən vətəndaşların barmağının mürəkkəblə işarələnməsi, bənövşəyi lampa ilə yoxlanılması, hansı hallarda seçicinin səsvermə hüququndan istifadə edə bilməyəcəyi barədə də məlumat verilir. Həmçinin bir dairədən olan seçicinin başqa dairədə necə səs verməsi, bu halda hansı qaydaların gözlənilməsi məsələləri ətraflı izah olunub. Təlim iştirakçılarına yaddaş kitabçası və digər zəruri əyani vəsaitlər, təlimatlar təqdim edilib.
Treninqlərdə aşağı seçki komissiyasının üzvlərinə səsvermə günü məntəqə seçki komissiyaları üzvlərinin rol və vəzifələri, seçki materialları və avadanlığının, seçki qutularının hazırlanması, əlavə seçici siyahıları, seçki otağının təşkili qaydaları barədə də məlumat verilir. Treninqə cəlb olunanlar müəyyənləşdirilməmiş seçki bülletenləri, hüquq-mühafizə orqanlarına müraciət edilməsi zəruri olan hallar, səsvermə saatlarında tədbirlər və digər məsələlər barədə məlumatlandırılıb.
Növbədənkənar prezident seçkilərində şəffaflığın və aşkarlığın təmin edilməsi üçün məntəqə seçki komissiyalarında hər cür şəraitin yaradıldığı, komissiya üzvlərinin normal fəaliyyəti üçün zəruri avadanlıqlarla təchiz olunduğu barədə məlumat verildi.
Əliqismət BƏDƏLOV
XQ