Mərkəzi Seçki Komissiyası tərəfindən təşkil olunan ölkə miqyaslı tədbirlərə – aşağı seçki komissiyalarının üzvləri üçün treninqlərə Sumqayıtda da start verilib.
Şəhərdə fəaliyyət göstərən seçki məntəqələrində maarifləndirmə proqramı çərçivəsində treninqlər 42 saylı Sumqayıt birinci, 43 saylı Sumqayıt ikinci və 45 saylı Sumqayıt dördüncü seçki dairələrində iştirakçıların fəallığı ilə keçirilib.
Treninqləri Mərkəzi Seçki Komissiyasının təşkil etdiyi “Trenerlər üçün treninq” kursunda iştirak etmiş müvafiq dairə komissiyalarının üzvləri Lamiyə Həsənova, Taleh Həsənov və Əhməd Quliyev aparıblar.
Gündə iki dəfə keçirilən tədbirlərə məntəqə seçki komissiyalarının bütün üzvləri cəlb olunub. MSK tədbirlərin səmərəliliyini təmin etmək məqsədi ilə bütün seçki dairələrini lazımi ləvazimatlar, broşürlər və vəsaitlərlə təmin edib.
Treninq zamanı iştirakçılara seçki keçirilən gün nəzərdə tutulan qaydalar haqqında müfəssəl məlumat verilib. Yekun protokolunun düzgün tərtib olunması və digər qaydalardan söhbət açılıb.
Tədbir iştirakçılarına MSK-nın mütəxəssisləri tərəfindən hazırlanan “Seçki günü üçün yaddaş” kitabçası, eləcə də səsvermənin nəticələri haqqında protokol nümunəsi və digər zəruri metodiki və əyani vəsaitlər təqdim olunub.
Əliqismət BƏDƏLOV
XQ
