Türkiyə arxivlərində Naxçıvan barədə qorunub saxlanılan sənədlər toplanaraq muxtar respublikaya gətirilib. Bununla bağlı Naxçıvan Muxtar Respublikası Dövlət Arxiv İdarəsində təqdimat keçirilib.

Mərasimdə AMEA Naxçıvan bölməsi­nin sədri, akademik İsmayıl Hacıyev top­lanan sənədlərin mühüm əhəmiyyətindən və materialların qorunub-mühafizə olun­masında arxivlərin rolundan danışıb. Alim qeyd edib ki, arxiv sənədlərinin tarixi fakt­ların dəqiqləşdirilməsində, təhriflərin ara­dan qaldırılmasında rolu olduqca mühüm­dür. Buna görə də Naxçıvanla bağlı xarici arxiv sənədlərinin toplanması məqsədilə ötən ay bölmənin 2 əməkdaşı Türkiyənin Ankara şəhərində olub. Onlar axtarışlar nəticəsində 3 min səhifədən artıq 500-ə yaxın sənəd əldə ediblər.

Əvvəlki illərdə AMEA Naxçıvan Böl­məsinin əməkdaşlarının London, Sankt–Peterburq və Tbilisi arxivlərindən mate­riallar topladığını bildirən bölmənin sədri gələcəkdə bu istiqamətdə nəzərdə tutulan işləri diqqətə çatdırıb. Daha sonra Tarix, Etnoqrafiya və Arxeologiya İnstitutunun Qədim və Orta əsrlər şöbəsinin müdiri, ta­rix üzrə fəlsəfə doktoru, dosent İlhami Əli­yev Türkiyə arxivlərindən böyük laborant Əli Tağıyevlə birgə əldə etdikləri sənədlər, həmin sənədlərin ümumi məzmunu və mahiyyəti haqqında məlumat verib.

Təqdimatda slayd nümayişi ilə topla­nan sənədlərdən bəziləri haqqında geniş məlumat verilib. Bildirilib ki, Türkiyədə­ki arxivlərdən Naxçıvan tarixinin bütün dövrləri ilə bağlı materiallar toplanıb. Bu sənədlərdən ən qədimi XII əsrə aiddir. 

Sonda akademik İsmayıl Hacıyev yeni arxiv materiallarını elektron variant­da Naxçıvan Muxtar Respublikası Dövlət Arxiv İdarəsinə təqdim edib. İdarə rəisi Mehman Məmmədov təqdim edilən arxiv materiallarına görə minnətdarlıq edib. Mərasimdə yeni sənədlərin Naxçıvanın tarixi, mədəniyyəti, müxtəlif tarixi dövrlər­dəki sosial-iqtisadi həyatı ilə bağlı araş­dırmalara töhfə verəcəyinə əminlik ifadə olunub.

XQ