Yeni məktəb Macarıstanın hədiyyəsi olacaq

Dünən Cəbrayıl rayonunun Soltanlı kəndinin rəsmi təməlqoyma mərasimi keçirilib.

Tədbirdə Macarıstanın xarici işlər və ticarət naziri Peter Siyarto, əmək və əhalinin sosial müdafiəsi naziri Sahil Ba­bayev, Dövlət Şəhərsalma və Arxitektu­ra Komitəsinin sədri Anar Quliyev, Şərqi Zəngəzur iqtisadi rayonuna daxil olan Cəbrayıl, Qubadlı və Zəngilan rayonla­rında Azərbaycan Prezidentinin xüsusi nümayəndəsi Vahid Hacıyev və Soltanlı kəndinin sakinləri iştirak ediblər.

Soltanlının Baş planı layihəsi Döv­lət Şəhərsalma və Arxitektura Komitəsi­nin sifarişi əsasında Macarıstanın tikinti və layihələndirmə sahəsində fəaliyyət göstərən "KESZ" şirkətlər qrupu və Bakı Dövlət Layihə İnstitutu tərəfindən hazırla­nıb.

Ümumi sahəsi 398,82 hektar olan və 6 100 nəfərdən ibarət 1 525 ailənin yaşaya­cağı proqnozlaşdırılan bu məskunlaşma ərazisində həyətyanı sahəsi olan fərdi ev­lərə üstünlük verilib. Burada ümumilikdə 496 fərdi yaşayış evinin tikintisi təklif olu­nur. Bununla yanaşı, kənddə 1 044 mən­zildən ibarət 4 və 5 mərtəbəli çoxmənzilli yaşayış binaları da yerləşdirilib.

Həmçinin kənd ərazisində inzibati bina, klub-icma mərkəzi, məktəb bina­sı, bağça, xəstəxana, idman-sağlamlıq mərkəzi, hotel, ticarət və ictimai-iaşə obyektləri, toxuculuq sexi, sənətkarlıq emalatxanaları, iri və xırda buynuzlu hey­vanların saxlandığı fermaların inşası da planlaşdırılıb. 

Soltanlı kəndində tikiləcək məktəb Macarıstan hökumətinin Azərbaycana hədiyyəsidir.

Bunu Macarıstanın tikinti və layihələn­dirmə sahəsində fəaliyyət göstərən "KESZ" şirkətlər qrupunun rəhbəri Otto İzso bildirib.

Onun sözlərinə görə, bu məsələ iki ölkə arasında dostluq münasibətləri­nin möhkəmlənməsinə xidmət edəcək: "Kəndin tikinti işlərini görmək bizim üçün əlamətdar hadisədir. Çox şadıq ki, bu iş bizə həvalə olunub. Ümid edirik ki, tezlik­lə bu kəndin sakinləri yüksək standartlara cavab verən evlərində xoşbəxt yaşaya­caqlar".

XQ