Onun elmi qənaətləri isə gələcəyə xidmət edəcək

74-cü Beynəlxalq Astronavtika Konqresində 132 ölkədən 5404 nümayəndə iştirak edib. “IAC” tarixində ilk dəfə idi ki, tədbirə bu sayda – 132 dövlətdən təmsilçi qoşulmuşdu. Ən böyük nümayəndə heyətləri Hindistan, ABŞ, Çin və Türkiyədən gəlmişdi. Özbəkistan, Türkmənistan və Qazaxıstan isə konqresə ilk dəfə qatılmışdı.

Bakı Konqresinə 95 ölkə­dən 3600 elmi məqalə təqdim edilmişdi. Bu, “IAC” tarixin­də ölkə sayı ilə bağlı rekord rəqəm idi. Həmin məqalələr­dən 2311-i konqresə qəbul edilmişdi. Həmçinin Azərbay­can da bu il həmin istiqamət­də ilkə imza atıb. Tədbirə rekord sayda – 214 məqalə ilə qoşulub. Azərbaycan ən çox elmi məqalə təqdim edən ölkələr siyahısında ABŞ, İtali­ya, Hindistan və Çindən son­ra beşinci yerdə qərarlaşıb.

Bakı Konqresi, həmçinin əldə edilmiş sponsorluq pa­ketlərinin sayına görə rekord göstərici qazanıb. 22 şirkət tədbirə sponsorluq paketi alıb. Bu, son beş ölkədə – Avstraliya, Almaniya, ABŞ, Birləşmiş Ərəb Əmirlikləri və Fransada keçirilmiş konqres­lərlə müqayisədə ən yüksək göstərici idi. 

55 təşkilat Astronavtika Federasiyasına üzv oldu

İlk dəfə olaraq 55 təşki­lat eyni vaxtda – məhz Bakı Konqresi zamanı Beynəlxalq Astronavtika Federasiyası ailəsinə üzv oldu.

Konqresin digər hədəfi isə tədbirdə gənclərin daha ge­niş miqyasda iştirakını təmin etmək idi. Bakı Konqresi öz hədəfinə çatıb. Belə ki, təd­bir iştirakçılarının 50 faizini 35 yaşa qədər olan gənclər təşkil edirdi. Tədbirə təkcə İslam Təhsil, Elm və Mədə­niyyət Təşkilatının (ICESCO) xətti ilə 500 tələbə qoşulmuş­du. Eyni zamanda Türkiyənin “Teknofest” festivalının 500 yarışmaçısı tədbirə gəlmişdi. 

İlon Maskın onlayn çıxışına 40 milyondan çox baxış olub

Konqresinin gündəliyi zən­gin oldu. Beş gün ərzində 423 interaktiv təqdimat, 168 texniki, 7 plenar sessiya və 20 qlobal netvörkinq forumu keçirilib.

İlk dəfə olaraq Bakı Konq­resində ABŞ və Afrikadan olan nümayəndələrlə dəyirmi masaların keçirilməsinə nail olundu. 

Konqresin zirvə nöqtələ­rindən biri oktyabrın 5-də “Space X” şirkətinin təsisçisi İlon Maskın tədbirdə onlayn formada çıxış etməsi oldu. İ.Mask onlayn çıxışı zamanı “SpaceX”in kosmik fəaliyyəti barədə sualları cavablan­dırdı, hazırda icrası davam edən layihələrinin təfərrüat­larını bölüşdü. O qeyd etdi ki, “Starship” kosmik gəmisi və “SpaceX”in “Starship” adla­nan super ağır raketi ekipajı, həmçinin yükləri Yer orbitinə, Aya, Marsa və ondan kənara daşımaq üçün nəzərdə tutul­muş tamamilə təkrar istifadə edilə bilən nəqliyyat sistemi­dir. “Starship” dünyanın indiyə qədər hazırlanmış ən güclü buraxılış aparatıdır, 150 met­rik tona qədər tamamilə tək­rar istifadə edilə bilən və 250 metrik tona qədər sərf edilə bilən yük daşıya bilir. İ.Mas­kın sözlərinə görə, “Starship” gəmisi 3-4 ildən sonra Marsa maneəsiz enə, həmçinin kos­mik laboratoriya kimi istifadə oluna bilər. Onun kosmosda istənilən müddətdə qalması mümkündür.

Təsadüfi deyil ki, növbəti rekord göstəricini İ.Maskın bu çıxışı qazandı. “X” platforma­sında onun 60 dəqiqəlik on­layn çıxışının yer aldığı pay­laşımına 40 milyondan çox baxış olub.

Şamaxı Rəsədxanasının əlaqələri genişləndi 

Konqresdə N.Tusi adına Şamaxı Astrofizika Rəsədxa­nasının (ŞAR) alimləri də iş­tirak edib və iki elmi məruzə təqdim ediblər. 

Beynəlxalq konqresdə iştirakçılar ilə qlobal tenden­siyalar, astronomiya sahəsin­də tərəfdaşlıq və əməkdaşlıq yolları müzakirə edilib. 

Alma-Ata Dövlət Univer­sitetindən olan alimlər rəsə­dxana ilə birgə elmi tədqiqat­ların aparılması üçün ŞAR-ın şəhər bölməsində olublar. Ye­kunda birgə əməkdaşlığın as­pektləri müzakirə olunub.

Qazaxıstanın Fesenkov adına Astronomiya İnstitutu ilə Şamaxı Astrofizika Rəsə­dxanası arasında əməkdaşlı­ğın rəsmiləşdirilməsi, əmək­daşlıq çərçivəsində təcrübə mübadiləsinin həyata keçiril­məsi üçün qarşılıqlı elmi eza­miyyətlərin təşkili və birgə elmi tədqiqatların aparılması üzrə ilkin razılıq əldə olunub. 

Həmçinin türkdilli dövlət­lərin birgə Astronomiya Cə­miyyətinin təsis edilməsi ilə bağlı danışıqlar aparılıb və bu istiqamətdə birgə işlərə baş­lanması nəzərdə tutulur.

XQ