Bakıda keçirilən beynəlxalq konfransda bu məsələlər müzakirə edilib 

Hesablama və Auditorlar palatalarının birgə təşkilatçılığı ilə dünən ümummilli lider Heydər Əliyevin 100 illik yubileyinə həsr olunan “Dayanıqlı inkişaf. Hesabatlılıq. Şəffaflıq” mövzusunda beynəlxalq elmi-praktik konfrans keçirilib. Tədbirin reallaşmasında əsas məqsəd dayanıqlı inkişaf modelinə keçid şəraitində hesabatlılıq anlayışına yeni yanaşma, maliyyə göstəriciləri ilə bərabər, qeyri-ma­liyyə, ekoloji, sosial və digər amilləri özündə ehtiva edən hesabat­lılıq, həmçinin nəzarət sisteminin qurulması sahəsində beynəlxalq təcrübənin öyrənilməsi və tətbiqi üzrə fikir mübadiləsi aparmaq, habelə tövsiyələr işləyib hazırlamaqdan ibarətdir.

Konfransda Avropa Müha­siblər və Auditorlar Federasi­yası, İmtiyazlı Sertifikatlaşdırıl­mış Mühasiblər Assosiasiyası kimi nüfuzlu beynəlxalq qurum­ları və 11 ölkəni – Azərbaycan, Türkiyə, Rusiya, Qazaxıstan, Gürcüstan, Latviya, Litva, Ma­kedoniya, İtaliya, Hindistan və Fransanı təmsil edən 150-dən çox nümayəndə iştirak edib. Beynəlxalq elmi-praktik konf­ransda Azərbaycan Respubli­kası Prezidentinin köməkçisi –Azərbaycan Respublikası Pre­zidentinin Administrasiyasının İqtisadi siyasət və sənaye məsələləri şöbəsinin müdiri Natiq Əmirov Prezident İlham Əliyevin konfrans iştirakçıları­na müraciətini oxuyub.

Tədbir çərçivəsində Da­yanıqlı İnkişaf Məqsədlərinə (DİM) nail olunması istiqamə­tində təcrübələr nəzərdən ke­çirilib, bu sahədə beynəlxalq əlaqələrin genişləndirilməsi zərurəti və onun reallaşdırıl­ması şərh olunub, “yaşıl iqti­sadiyyat”, sosial məsuliyyət və ekoloji tarazlığın təmin edilmə­si sahəsində müzakirələr apa­rılıb.

Auditorlar Palatasının sədri Vahid Novruzov konfransdakı çıxışında mövcud hesabla­malara əsaslanaraq bildirib ki, DİM-ə nail olmaq üçün dün­yada ÜDM-in 1,5-4 faizi qə­dər resurs tələb edilir. Məhz biznes strukturlarının daya­nıqlı inkişaf sahəsində dövlət təşəbbüslərinə cəlb olunması­nın vacibliyi də məhz bununla əlaqələndirilir. O qeyd edib ki, DİM-də informasiya əlçatanlı­ğı, məlumatların toplanılması, monitorinqi və hesabatlılığı da­yanıqlı inkişaf üçün ən mühüm elementlər kimi dəyərləndirilir.

Ümumiyyətlə, beynəlxalq qurumların məlumatına görə, 17 DİM-in 8-i mühasibat uço­tu, hesabatlılıq və o cümlədən auditlə birbaşa əlaqədardır. Başqa sözlə, mühasiblər və auditorlar DİM-nin reallaşma­sında mühüm rola malikdir. Bununla yanaşı, mühasibat uçotunun və auditin də korpo­rativ dayanıqlı inkişafın yeni tələblərinə uyğun olaraq trans­formasiyası bu günün tələbləri sırasındadır. Məhz mühasibat uçotu və auditin birbaşa təsiri ilə dayanıqlı inkişafın təhsilin keyfiyyəti, gender bərabərli­yi, ləyaqətli əmək və iqtisadi artım, məsuliyyətli istehlak və istehsal, bərabərsizliyin azal­dılması, təhlükəsizlik, iqlim dəyişikliyi, ekosistemin qorun­ması, güclü institutların yara­dılması və əməkdaşlıq kimi Dayanıqlı İnkişaf Məqsədləri reallaşa bilər.

Hesablama Palatasının sədri Vüqar Gülməmmədov çıxışında dövlət orqanları və müəssisələr qarşısında şəffaf­lıq, hesabatlılıq və dürüstlük kimi prinsiplərə dönmədən əməl olunmasının zəruriliyi haqqında söhbət açıb. Palata sədri daha sonra təmsil etdiyi qurumun fəaliyyəti haqqında məlumat verərək cari ilin 8 ayında həyata keçirilən nə­zarət tədbirləri nəticəsində artıq xərcləmənin, eləcə də büdcəyə hesablanmamış ödə­nişlərin məbləğinin 91,6 milyon manat təşkil etdiyini diqqətə çatdırıb. O, həmin məbləğin 39,6 milyon manatının dövlət büdcəsinə bərpası ilə bağlı qərar qəbul edildiyini, cinayət əməlinin olduğu ehtimal edilən 9 material üzrə isə 28,5 milyon manatdan yuxarı rəqəmlə bağ­lı məlumatların hüquq-müha­fizə orqanlarına göndərildiyini xatırladıb. 

Bu gün isə iştirakçıların Heydər Əliyev Mərkəzinə zi­yarəti, xarici ölkələrin audit və mühasibat qurumlarının nü­mayəndələri ilə auditin norma­tiv-hüquqi bazasına, metodiki təminatına, təşkili və tənzim­lənməsinə dair təcrübə müba­diləsi və Bakı şəhəri ilə tanışlıq nəzərdə tutulub.

XQ