Naxçıvanda Ümummilli lider Heydər Əliyevin anadan olmasının 100 illiyinə həsr olunmuş tədbirlər çərçivəsində uşaqlar üçün "Zəfər düşərgəsi" təşkil edilib. Ağbulaq İstirahət Mərkəzində keçirilən iki günlük toplantıda 40-dək şəhid övladı iştirak edib.
Düşərgədə iştirakçılarla görüşən Naxçıvan Muxtar Respublikasının Əmək və Əhalinin Sosial Müdafiəsi nazirinin müavini Nicat Babayev balacalara ulu öndər Heydər Əliyevin uşaqların müstəqil ölkənin gələcək qurucuları kimi böyümələri ilə bağlı gördüyü çoxsaylı tədbirlər barədə ətraflı məlumat verib. O qeyd edib ki, yeni nəsilə sonsuz sevgi bəsləyən böyük rəhbər onların sağlam, savadlı, tərbiyəli və qayğısız böyüməsi üçün tələb olunan şəraitin çağdaş əsaslarını yaradıb.
Bildirilib ki, müharibədən zərər çəkmiş insanlara, xüsusən də şəhid ailələrinə, qazilərə hərtərəfli qayğı göstərilməsi ölkəmizdə ulu öndərin müəyyən etdiyi sosial siyasətin əsas istiqamətlərindən biridir. Bu sahədə muxtar respublikada sistemli və ardıcıl tədbirlər həyata keçirilir. İndiki düsərgə də bunlardan biridir. Naxçıvan Muxtar Respublikasında Azərbaycan ərazi bütövlüyü uğrunda döyüşlərdə yaralananlara və şəhid olanların ailələrinə “Dəstək” Fondu və onun Himayəçilik Şurası da davamlı diqqət və qayğı göstərir.
Düşərgədə uşaqlarla psixoloji seans aparılıb, onlarda şən əhval yaradılıb. Müxtəlif əyləncəli oyunlar, idman yarışı, “İstedadını göstər” adlı yaradıcılıq müsabiqəsi təşkil edilib. Uşaqlara yeni dərs ili ərəfəsində məktəb ləvazimatları hədiyyə edilib.
Səbuhi HƏSƏNOV,
XQ
Naxçıvan