Azərbaycan Meliorasiya və Su Təsərrüfatı Açıq Səhmdar Cəmiyyətinin məlumatına görə, 11 min hektardan artıq əkin sahəsinə xidmət edən Cəlilabad Suvarma Sistemləri İdarəsində ilin əvvəlindən etibarən suvarma mövsümünə ciddi hazırlıq işləri görülüb, bütün meliorativ tədbirlər yekunlaşıb.
Qeyd edək ki, adıçəkilən idarə sahələrin suvarılması üçün mənbə olaraq Cənubi Muğan kanalı və 3 ədəd su anbarından istifadə edir. Balansda olan suvarma kanallarınının böyük əksəriyyəti torpaq məcralı olduğundan mütəmadi olaraq lildən və kol-kosdan təmizlənir. Bununla da, suyun axını maneəsiz olaraq təmin edilir, əkin sahələrinin suvarılması yaxşılaşdırılır.
Hazırda Cəlilabad Suvarma Sistemləri İdarəsinin balansında 495 hektar əkin sahəsinə xidmət edən 112-ədəd subartezian quyusu və 12 ədəd nasos stansiyası var ki, bunların da hər birinə baxış keçirilərək təmir olunur. Subartezian quyularının dərinlik nasosları, nasos stansiyaların isə nasos aqreqatları daim saz vəziyyətdə saxlanılır. Bununla yanaşı, kanallar üzərində olan hidrotexniki qurğular da təmir işləri aparılır. İlin əvvəlindən aparılan işlər çərçivəsində 3 nasos stansiyası, 15 subartezian quyusu, 18 hidrotexniki qurğu və 1,5 kilometr nov kanal cari təmir olunub.
“Xalq qəzeti”