Yanvar-iyul ayları ərzində hüquq mühafizə orqanlarının narkomanlığa və narkotik vasitələrin qanunsuz dövriyyəsinə qarşı mübarizə sahəsində həyata keçirilmiş kompleks əməliyyat-axtarış tədbirləri nəticəsində ümumilikdə 6696 cinayət faktı aşkarlanıb. Onlardan 2335-i narkotik vasitələrin qanunsuz satışı, 4112-i narkotik vasitələrin qanunsuz əldə edilib saxlanılması, 219-u qanunsuz olaraq narkotik xassəli bitkilərin kultivasiya edilməsi, 30-u isə bu kateqoriyadan olan digər cinayətlərlə bağlı olub.
Bu barədə “XQ”yə Dövlət Komissiyasından məlumat verilib.
Aşkarlanmış faktlar üzrə qanunsuz dövriyyədən, ümumilikdə, 5 ton 141 kiloqram 918,699 qram narkotik vasitələrin və psixotrop maddə müsadirə olunub.
Hesabat dövründə aidiyyəti qurumların nümayəndələrinin iştirakı çəkisi 210 tondan çox olan narkotik tərkibli bitkilər müəyyən olunaraq məhv edilib.
Hüquq-mühafizə orqanları tərəfindən narkotik vasitələrin və psixotrop maddələrin qaçaqmalçılıq yolu ilə ölkə ərazisinə gətirilməsi ilə bağlı 165 fakt aşkarlanıb.
2023-cü ilin yanvar-iyul ayları ərzində qanunsuz dövriyyədən götürülmüş narkotik vasitələrin və psixotrop maddələrin ümumilikdə dəyəri 225 milyon 99 min 265 manat kimi qiymətləndirilir.
XQ
.jpeg)
