İyulun 13-də Azərbaycan Respublikasının diplomatik xidmət orqanlarının rəhbərlərinin müşavirəsi çərçivəsində Xarici İşlər Nazirliyinin rəhbər heyətinin və xarici ölkələrdə akkreditə olunmuş diplomatik nümayəndəliklərimizin rəhbərlərinin Ağdam şəhərinə səfəri təşkil olunub. 

XİN-dən aldığımız xəbərdə bildirilir ki, səfərdə iştirak edən xarici işlər naziri Ceyhun Bayramov, Birinci vitse-preziden­tin köməkçisi Elçin Əmirbəyov, xaricdəki diplomatik missiyalarımızın rəhbərləri Ağ­dam Şəhidlər xiyabanını ziyarət ediblər.

“Ağdamın dirçəlişi” adlı təqdimatda açılış nitqi ilə çıxış edən nazir Ceyhun Bayramov Ağdamın, Qarabağın Azər­baycan xalqı üçün əhəmiyyətindən bəhs edərək, bu gözəl şəhərin Ermənistan tərəfindən məqsədyönlü şəkildə dağıdıl­masının Azərbaycana qarşı etnik nifrət və dözümsüzlük siyasətinin tərkib hissəsi olduğunu bildirib.

Qarabağ iqtisadi rayonuna daxil olan işğaldan azad edilmiş ərazilərdə Azər­baycan Respublikası Prezidentinin xüsusi nümayəndəsi Emin Hüseynov aparılan genişmiqyaslı bərpa və quruculuq işləri barədə tədbir iştirakçılarını ətraflı məlu­matlandırıb.

Azərbaycan Respublikasının Minatə­mizləmə Agentliyinin İdarə Heyətinin sədri Vüqar Süleymanov işğaldan azad olunmuş ərazilərdə görülən işlər barədə təqdimat edib. AMEA Tarix İnstitutunun şöbə müdiri, professor Mais Əmrahov Ağ­damın, Qarabağın tarixi ilə bağlı mühazirə ilə çıxış edib.

Qarabağ və Şərqi Zəngəzurda bərpa və quruculuq işlərinə həsr olunmuş vi­deoçarx nümayiş olunub. İştirakçılar Ağ­damın tarixi və mədəni irs nümunələri ilə tanış olublar.

“Xalq qəzeti”