Tanınmış fotojurnalist, mühacir soydaşımız Reza Deqatinin yaradıcılığında Azərbaycan mövzusu əsas yer tutur. O, dəfələrlə ölkəmizi gəzərək sadə insanların gündəlik həyatını, məişətini, adət-ənənələrini fotolarda əbədiləşdirib.
Reza Deqati 20 Yanvar və Xocalı faciələrinin müdhiş görüntülərini lentə almağa nail olub. O, 44 günlük Vətən müharibəsi zamanı həm erməni təxribatları nəticəsində zərər görmüş mülki şəxsləri və obyektləri, həm də mənfur düşmənlərimizin işğal edilmiş ərazilərdə ziyan vurduğu, vandalizm aktına məruz qoyduğu tarix və mədəniyyət abidələrini böyük ustalıqla fotolarda əbədiləşdirib. 2014-cü ilin noyabrında Fransada Heydər Əliyev Fondunun və qurumun prezidenti Mehriban xanım Əliyevanın və vitse-prezident Leyla Əliyevanın dəstəyi ilə Reza Deqatinin Azərbaycana həsr olunan fotosərgisi keçirilib, eyni zamanda, onun iki kitabı işıq üzü görüb.
Növbəti dəfə doğma Vətənə gələn Reza Deqati AMEA-nın Mərkəzi Elmi Kitabxanasında (MEK) olub. Görüş zamanı MEK-in baş direktoru, professor Məmməd Əliyev Reza Deqatinin nümayiş etdirdiyi fotolardan hər kəsin təsirləndiyini dilə gətirib və İkinci Qarabağ müharibəsi dövründə Azərbaycan həqiqətlərinin dünyaya çatdırılmasında fotojurnalistin xidmətlərini yüksək dəyərləndirib. Bildirilib ki, müharibə günlərində Azərbaycanın dinc əhalisinə qarşı törədilən cinayətlər, mənfur qonşularımız tərəfindən amansızlıqla dağıdılan şəhər və kəndlərimizin görüntüləri geniş auditoriyaya Reza Deqatinin fotoları vasitəsilə xüsusi peşəkarlıqla çatdırılıb.
Qonaq, öz növbəsində, azad olunmuş ərazilərə səfəri, görülən işlər və gələcək layihələr barədə danışıb. Bu baxımdan Mərkəzi Elmi Kitabxanada qorunan nəşrlərin, sənədlərin faydalı ola biləcəyini deyib.
Sonra R.Deqati elmi kitabxana ilə yaxından tanış olub, “Qarabağ müharibəsi qəhrəmanları”, “Nadir kitablar” və “Qiymətli nəşrlər” fondlarında bölgənin etnoqrafiyasına, tarixinə dair dəyərli nəşrlərə baxıb, ona buradakı guşələr haqqında geniş məlumat verilib. Görüşün sonunda dünya şöhrətli Azərbaycan əsilli fotoqrafa MEK-in “Heydər Əliyev İli”nə həsr etdiyi təqvim hədiyyə edilib.
N.ƏLİ, “Xalq qəzeti”
.png)
