Türkiyənin Azərbaycandakı səfirliyi, Şərqi Anadolu İnkişaf Agentliyi və Van Yüzüncü İl Universitetinin təşkilatçılığı ilə “Türkiyə–Azərbaycan regional əməkdaşlıq imkanları” mövzusunda onlayn konfrans keçirilib.

Məclisi giriş nitqi ilə Van Yüzüncü İl Universitetinin Sosial Elmlər İnstitutu­nun direktoru, professor Dr. Bəkir Koçlar açıb. AMEA-nın prezidenti, akademik İsa Həbibbəyli tarixi Azərbaycan–Türkiyə qardaşlığı və əməkdaşlığı barədə söz açıb. Ümummilli lider Heydər Əliyevin artıq şüara çevrilmiş “Bir millət – iki döv­lət” sözlərini xatırladan AMEA rəhbəri iki qardaş ölkə arasında əsası ulu öndər tərəfindən qoyulmuş strateji əlaqələrin bu gün Azərbaycan Prezidenti İlham Əliyev və Türkiyə Prezidenti Rəcəb Tay­yib Ərdoğan tərəfindən daha da inkişaf etdirildiyini vurğulayıb. Qeyd edib ki, elm sahəsində də qurulmuş əməkdaşlıq əlaqələri yüksək inkişaf mərhələsinə qə­dəm qoyub. 

Akademik İsa Həbibbəyli bu gün AMEA-nın qardaş ölkənin TÜBA, Ata­türk Kültür, Dil və Tarix, TÜBİTAK kimi elmi qurumları və onlarla universitetləri ilə səmərəli elmi əməkdaşlıq əlaqələrini yüksələn xətlə inkişaf etdirdiyini söyləyib.

O, ədəbiyyat, dil, tarix, seysmologiya, iqtisadiyyat, demoqrafiya və digər elm sahələri üzrə əməkdaşlığın genişləndiril­məsinin, bir sıra ortaq layihələrin həyata keçirilməsinin əhəmiyyətini vurğulayıb. 

Konfransda AMEA Tarix İnstitutunun baş direktoru, professor Kərim Şükürov, Azərbaycan Respublikası Kiçik və Orta Biznesin İnkişafı Agentliyinin İdarə Heyə­tinin sədri Orxan Məmmədov, Türkiyənin Azərbaycandakı fövqəladə və səlahiyyət­li səfiri Cahit Bağçı, Azərbaycanın Tür­kiyədəki səfirliyinin mədəniyyət üzrə baş katibi İslam Quliyev, Van Yüzüncü İl Uni­versitetinin rektoru, professor Hamdullah Şevli, Şərqi Anadolu İnkişaf Agentliyinin baş katibi, professor Xəlil İbrahim Güray və başqaları çıxış edərək gündəlikdə nəzərdə tutulan məsələlər ətrafında fikir və mülahizələrini bildirib, təkliflərini səs­ləndiriblər.

Konfransda “İki şəhər, bir hekayə: Van və Şuşa” mövzusunda panel iclası da keçirilib, iqtisadi, mədəni və turizm üzrə əməkdaşlıq imkanları müzakirə olu­nub.

Ə.ƏLİYEV, “Xalq qəzeti”