Qarabağdakı qondarma qurumun missiyaları bitib

Milli Məclisin deputatı Vahid Əhmədov parlamentin iclasında Qarabağ mövzu­sundan danışarkən deyib: “Bizim üçün ən çətin məsələlərdən biri sərhəddə nə­zarət – buraxılış məntəqəsini qoymaq idi. Bunu da həll etdik. İndi ermənilər oradan keçmək məcburiyyətindədir və sakitcə gedib-gəlirlər. Bu, Azərbaycan dövlətinin apardığı uğurlu xarici siyasətin nəticəsidir. Sərhəddən sonra inteqrasiyanın Qaraba­ğın dağlıq hissəsinə də sirayət etməsinə gəldikdə isə, fikrimcə, artıq bu məqam da yetişib. Artıq Xankəndi və ətraf ərazilərdə Azərbaycanın dövlət qurumlarının fəaliy­yət göstərməsi vacibdir. Doğrudur, ha­zırda Qarabağa xüsusi nümayəndə təyin olunub və o, fəaliyyət göstərir, lakin böl­gədə qondarma qurumun da mövcudluğu var. Mənə elə gəlir ki, onlar da başa dü­şürlər ki, artıq missiyaları bitib”.

Universitetlərimizin adı niyə yaxşılar sırasında yoxdur?

Fazil Mustafa: Böyük Britaniyanın “World University Ranking” nəşri 2023-cü ildə dünyanın ən yaxşı universitetlərinin reytinqini dərc edib. Reytinqə Qazaxısta­nın 9 şəhərindən 21 universitet daxil olub. Amma 30 ildir müstəqil olan Azərbayca­nın bir universitetinin belə bu siyahıda adı niyə yoxdur? Çünki universitetlərimizdə təhsil günün tələbləri səviyyəsində deyil. 

Cərimələr niyə bu qədər artırılır?

Deputat Fazil Mustafa İnzibati Xəta­lar Məcəlləsinə edilən dəyişikliklərə – yol hərəkəti ilə bağlı cərimələrin artırılmasına etirazını bildirib: “Cərimələrin artırılması, əslində, vətəndaş üçün yükdür. Bu səviy­yədə cərimə artırılmaz. Bu, doğru yanaş­ma deyil. Ona görə ki, cəriməni həddən artıq sərtləşdirəndə bu pul vətəndaşın cibindən çıxır. Vətəndaş yoxsullaşanda isə dövlət yoxsullaşır. Mən bu prinsipin əleyhinəyəm. Hesab edirəm ki, bacar­dıqca vətəndaşın yükünü azaltmaq lazım­dır. Yoxsa ki, hər şeyə rüsum, hər şeyə cərimə, ödəniş - bu, artıq normal yaşam imkanlarından kənara çıxır”.

Məlumat üçün qeyd edək ki, avtomo­bil yollarının saxlanılması və qorunması qaydalarının (38.1) pozulmasına görə cə­rimələr yeni layihəyə əsasən, 5 dəfədən çox artırılıb.

Keyfiyyətsiz dərmanlar bazara necə daxil olur?

Milli Məclisin Səhiyyə komitəsinin səd­ri Əhliman Əmiraslanov keyfiyyətsiz dər­manların ölkəyə hansı yollarla daxil olma­sı ilə bağlı məsələ qaldırıb: “Dərmanların keyfiyyətinin aşağı olmasının səbəbləri araşdırılmalıdır. Keyfiyyətsiz dərmanları gətirənlər üzə çıxarılmalıdır. Bunlar şəxsi istifadə üçün gətirən vətəndaşlar deyil. Bu dərmanlar başqa yollarla gəlir. Bu kimi va­sitələrdən, eyni zamanda, şəxsi maraqlar üçün də istifadə olunur. Keyfiyyətsiz dər­man vasitələrinin bazara necə daxil olma­sı məsələsinə aydınlıq gətirilməlidir”.

Makron faşizmi dəstəkləyir

“Fransada ötən ayın sonunda 17 yaşlı əlcəzairli gəncin öldürülməsi ilə başlayan etiraz dalğası ölkədə böyük qarşıdurma­ya səbəb olub. Bu hadisə Fransada fərqli millətlərə qarşı etnik nifrət, dözümsüzlük və zorakılıq hallarının pik həddə çatdığını göstərdi”. Bu fikirləri deputat Vahid Əhmə­dov səsləndirib. O deyib ki, Afrika ölkələ­rində törətdiyi qətliamlara baxmayaraq, özünü demokratiya və insan haqlarının himayədarı kimi təqdim edən dövlətin öz xalqı ilə bu cür rəftarı prezident Emma­nuel Makron hökumətinin əsl simasını göstərdi: “İşğalçı dövlətlə həmrəylik nü­mayiş etdirən Makron bu gün də erməni faşizminin əsas himayədarlarından biridir. Son illər Fransada etnik-milli zəmində baş verən cinayətlərin və zorakılıqların artma­sı isə onun irqçi siyasətinin ölkədaxili ni­zamı alt-üst etməsindən xəbər verir”. 

Hərbi doktrinaya dəyişiklik təklif edildi

“Azərbaycan torpaqlarını işğaldan azad edib və “Azərbaycan Respublika­sının Hərbi doktrinası”nda dəyişikliklərin vaxtıdır”. Bu təklifi deputat Elşad Mirbəşir səsləndirib: ”Bəzi ölkələrin hərbi doktri­naları hər il, iki ildən bir dəyişir. Azərbay­canın da müasir dünyada yeni reallıqlara uyğun hərbi doktrinasına dəyişikliklər edilməsi vacibdir. Artıq Azərbaycana qar­şı olan təhlükələrin xarakteri də dəyişib. Ona görə dəyişikliyə zərurət yaranıb. Bi­zim üçün təhlükəli sayılan ölkələrin adı Hərbi doktrinada yer almalıdır. Bunlardan biri Fransa olmalıdır”.

Əliqismət BƏDƏLOV, “Xalq qəzeti”