Brüsseldə, Ümumdünya Gömrük Təşkilatının (ÜGT) Baş qərargahında ÜGT Siyasi Komissiyasının 88-ci sessiyası işə başlayıb. Sessiyada Dövlət Gömrük Komitəsinin sədri, gömrük xidməti general-leytenantı Şahin Bağırovun rəhbərlik etdiyi nümayəndə heyəti iştirak edir.
Sessiyada COVID-19 layihəsi üzrə yekun hesabat, Özəl Sektor Məşvərət Qrupunun iclasına dair hesabat, elektron ticarətlə bağlı yeniliklər, “yaşıl gömrük”, həssas sərhədlər və digər məsələlər müzakirə olunur.
ÜGT Gömrük Əməkdaşlıq Şurasının sədri Şeyx Əhməd bin Hamad Əl Xəlifə gündəlikdəki “yaşıl gömrük” mövzusunda müzakirələr zamanı Azərbaycan gömrüyünün bu istiqamətdə verə biləcəyi töhfələri xüsusi vurğulayıb.
ÜGT Baş katibi Kunio Mikuriya Azərbaycan gömrük xidmətinin təşəbbüsü və təşkilatçılığı ilə “Orta Dəhliz boyu tranzit gömrük prosedurunun sadələşdirilməsi layihəsi” çərçivəsində Bakıda region ölkələrinin gömrük xidmətləri rəhbərlərinin iştirakı ilə aparılan müzakirələrin məlumat mübadiləsi və əməkdaşlığın gücləndirilməsi baxımından mühüm əhəmiyyət daşıdığını bildirib.
“Xalq qəzeti”
