Energetika naziri Pərviz Şahbazov Azərbaycana səfəri çərçivəsində Neft İxrac edən Ölkələr Təşkilatının (OPEC) baş katibi Haysam Əl-Qays ilə görüşüb. 

Nazirlikdən bildirilib ki, görüşdə OPEC ilə Azərbaycanın “Əməkdaşlıq Bə­yannaməsi” çərçivəsində əməkdaşlığı, ölkəmizin qlobal neft bazarının tənzim­lənməsində iştirakı, həmçinin tələb-təklif dinamikası ilə bağlı hazırkı vəziyyət və inkişaf tendensiyaları ilə bağlı məsələlər müzakirə edilib. 

“OPEC plus” formatı təşəbbüsünün irəli sürülməsi və həyata keçirilməsində Azərbaycan Respublikasının Prezidenti İlham Əliyevin tarixi rolu yüksək qiymət­ləndirilib. Baş katib deyib: “Prezident İlham Əliyevin enerji təhlükəsizliyi, neft-qaz sənayesinin inkişafı, investisiyalar haqqında çox aydın baxışları birgə fəa­liyyətimiz üçün yeni imkanlar açır. Azər­baycanla eyni mövqeyi bölüşməyimiz­dən məmnunuq”. 

Bildirilib ki, “OPEC plus” çərçivəsin­də əməkdaşlığın məqsədi iqtisadi inkişaf üçün dünyanı lazım olan enerji ilə təmin etməkdir. Bu isə bütün enerji növlərindən istifadə ilə mümkün ola bilər. 

Energetika naziri Pərviz Şahbazov isə deyib ki, karbon emissiyalarının azal­dılması ilə neft-qaz sektorunun inkişafı dayanıqlı enerji təhlükəsizliyi üçün va­cibdir. Bu yanaşma əsasında Azərbay­can, OPEC, digər ölkə və təşkilatların iştirakı ilə daha geniş platformada əmək­daşlığa ehtiyac var və biz neft bazarının sabitləşdirilməsi ilə bağlı səylərimizi bu istiqamətdə də inkişaf etdirməliyik. 

Söhbət zamanı Azərbaycanın OPEC Katibliyi əlaqələrinin dərinləşdirilməsi, “OPEC plus” formatında əməkdaşlığın təşkilata üzv ölkələrlə Azərbaycanın “ya­şıl enerji” sahəsində tərəfdaşlığına verdi­yi töhfələrdən də bəhs edilib.

Q.QASIMOV, “Xalq qəzeti”