Nazirlikdə keçirilən tədbirdə gəncləri əlamətdar yubiley - “Heydər Əliyev İli”ndə qulluğa qəbul olunmaları münasibətilə təbrik edən nazir ulu öndər Heydər Əliyevin xalqımız və dövlətimiz qarşısındakı misilsiz xidmətlərindən, xilaskarlıq missiyasından danışıb, gənclərə qayğısını qeyd edib. Bildirib ki, Ümummilli Lider fəaliyyətinin bütün dövrlərində milli, o cümlədən hərbi kadrların yetişdirilməsi, gənclərin hərtərəfli inkişafı üçün əvəzsiz xidmətlər göstərib. Onun təməlini qoyduğu dövlət gənclər siyasəti bu gün Prezident İlham Əliyevin rəhbərliyi ilə uğurla həyata keçirilir. Bu istiqamətdə Birinci vitse-prezident Mehriban Əliyevanın təşəbbüsü ilə Heydər Əliyev Fondu tərəfindən mühüm tədbirlər həyata keçirilir.
Çıxış edən gənclər bu əziz bayram günündə qulluğa qəbul olunmalarından böyük qürur hissi keçirdiklərini bildirib, şərəfli ədliyyə işçisi adını daim uca tutacaqlarını vurğulayıblar.
Yeni təyinat almış əməkdaşlar and içiblər, onlara xidməti vəsiqələr təqdim edilib.
Qəzənfər QASIMOV, “Xalq qəzeti”