Azərbaycan Respublikasının İqtisadiyyat naziri Mikayıl Cabbarov iyunun 2-də Gürcüstanın Baş naziri İrakli Qaribaşvili ilə görüşüb.
Gürcüstan hökumət administrasiyasında keçirilən görüşdə Gürcüstan ilə Azərbaycan arasında iqtisadi əməkdaşlığın müsbət dinamikası və ölkələrimiz arasında mövcud strateji tərəfdaşlığın əsas istiqamətləri nəzərdən keçirilib. Siyasi dialoqun daha da gücləndirilməsinin vacibliyi qeyd edilib.
Söhbət zamanı Gürcüstan ilə Azərbaycanın dünya və regional əhəmiyyətli müxtəlif iqtisadi, enerji və nəqliyyat layihələrini uğurla həyata keçirdiyi bildirilib, iki ölkə arasında mövcud potensialdan tam istifadə etmək məqsədilə gələcəkdə daha sıx əməkdaşlığın vacibliyi vurğulanıb.
Hər iki ölkənin investisiya potensialı diqqət mərkəzində olub. Qeyd edilib ki, Gürcüstan hökumətinin prioritet istiqamətlərindən biri ölkənin tranzit funksiyasını gücləndirmək və regional logistika qovşağının formalaşdırılmasıdır.
Söhbət zamanı Bakı–Tbilisi–Qars yeni birləşdirici dəmir yolu xəttinin tikinti işlərinin sürətləndirilməsinin vacibliyi qeyd olunub.
Görüşdə Baş nazir İrakli Qaribaşvili Azərbaycan nümayəndə heyətini bu ilin payızında Tbilisidə keçiriləcək “İpək Yolu Forumu”na dəvət edib.
Görüşdə Baş nazirin müavini, iqtisadiyyat və davamlı inkişaf naziri Levan Davitaşvili, Azərbaycan Tbilisidəki səfiri Faiq Quliyev və Gürcüstanın Bakıdakı səfiri Zurab Pataradze iştirak ediblər.
***
Azərbaycanın iqtisadiyyat naziri Mikayıl Cabbarov Gürcüstana səfəri çərçivəsində bu ölkənin Baş nazirinin müavini, iqtisadiyyat və davamlı inkişaf naziri Levan Davitaşvili ilə görüşüb.
Görüşdə iqtisadiyyat naziri Mikayıl Cabbarov Gürcüstanla əlaqələrin yüksələn xətlə inkişaf etdiyini vurğulayıb, iqtisadi-ticarət əməkdaşlığının inkişafı, birbaşa investisiyaların cəlb edilməsi sahəsində tərəfdaşlıq məsələlərinə dair fikirlərini bildirib.
Levan Davitaşvili tərəfdaşlığın şaxələndirilməsi barədə fikirlərini bölüşüb, birgə layihələrin önəmini, Gürcüstan şirkətlərinin ölkəmizdə həyata keçirilən investisiya layihələrində iştirak etməkdə maraqlı olduqlarını qeyd edib.
***
Ulu öndər Heydər Əliyevin 100 illiyi münasibətilə Tbilisidə keçirilən Azərbaycan-Gürcüstan biznes forumu çərçivəsində Azərbaycanın və Gürcüstanın iki dövlət qurumu arasında əməkdaşlığa dair anlaşma memorandumu imzalanıb.
Birinci sənəd Azərbaycanın İqtisadiyyat Nazirliyi yanında Əmlak Məsələləri Dövlət Xidməti və Gürcüstanın Ədliyyə Nazirliyinin Dövlət Reyestri üzrə Milli Agentliyi arasında imzalanıb. Sənədə əsasən dövlət idarələri daşınmaz əmlakın qeydiyyatı və kadastr fəaliyyəti sahələrində əməkdaşlıq edəcəklər.
Digər memorandum Kiçik və Orta Biznesin İnkişafı Agentliyi (KOBİA) ilə Gürcüstanın Biznes Assosiasiyası arasında imzalanıb.