Mayın 18-də Naxçıvan regional “ASAN xidmət” mərkəzi istifadəyə verilib. Açılış mərasimində Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev iştirak ediblər.
Bildirilib ki, Naxçıvanda istifadəyə verilən növbəti “ASAN xidmət” respublikada 26-cı belə mərkəzdir. Bu müasir dövlət xidməti müəssisəsi Naxçıvan şəhəri Seyid Cəfər Pişəvəri, 7 ünvanında inşa edilib. Obyektin tikintisinə 2020-ci ildə başlanılıbvə bu ay başa çatdırılıb. Mərkəzdə videomüşahidə, görüntüləmə və videonövbə sistemləri, iki ədəd lift, yanğınsöndürmə sistemi, mərkəzləşdirilmiş havalandırma, istilik sistemi, generator və UPS quraşdırılıb.
Qeyd olunub ki, mərkəzdə müxtəlif dövlət orqanları, həmçinin özəl şirkət və müəssisələr tərəfindən 360-dan çox xidmət həyata keçiriləcək. Ümumilikdə, Naxçıvan Muxtar Respublikasında qeydiyyatda olan 465 min vətəndaşı əhatə edən mərkəz ərazi məhdudiyyəti olmadan fəaliyyət göstərəcək. Əməkdaşların ümumi sayı 228, könüllülərin sayı 45 nəfər nəzərdə tutulur.
Mərkəz daxilində vətəndaşlara “ASAN kafe” də xidmət göstərir. Ərazdə 50 avtomobil üçün parklama yeri yaradılıb.
“Xalq qəzeti”
