Mayın 12-də Sahibə Qafarovanın sədrliyi ilə Milli Məclisin yaz sessiyasının növbəti plenar iclası keçirildi. Parlamentin sədri bugünlərdə Ermənistan ordusunun cəbhədə törətdiyi təxribata münasbət bildirərək dedi ki, bütün məsuliyyət Ermənistanın hərbi-siyasi rəhbərliyinin üzərinə düşür. Ermənistanın bu təxribatda əsas məqsədi hazırda aparılan sülh danışıqlarının pozulmasıdır. 

Sonra cari məsələlərin müzakirə­si başlandı. Deputatlar sabah qardaş Türkiyədə keçiriləcək prezident və par­lament seçkilərinin uğurla başa çatma­sını arzuladılar. 

İclasda bəzi ermənipərəst qüvvələ­rin Azərbaycana qarşı qərəzli mövqe­yindən də söhbət açıldı. Deputat Elşad Mirbəşir dedi ki, Fransa Xarici İşlər Nazirliyi Qarabağ ərazisini “anklav” adlandırıb və çəkinmədən Azərbaycan ərazilərini Ermənistan ərazisi kimi təq­dim edib. O, sülh gündəliyinin aktual olduğu bir dövrdə Fransanın belə bir mövqedən çıxış etməsinin, bütövlük­də, region üçün təhlükə yaratdığını söylədi. Deputat Qüdrət Həsənquliyev isə təəssüflə bildirdi ki, Ermənistan 44 günlük savaşdan hələ də nəticə çıxarmayıb. Onlar yenə də münaqişə­ni uzatmaq, hansısa möcüzələrin baş verəcəyini gözləməkdədirlər. Çox təəs­süf ki, Fransa da onlara dəstək verir. 

Çıxış edənlər Prezident İlham Əliyevin Qarabağa və Şərqi Zəngəzura səfər çərçivəsində bir sıra obyektlərin açılış, bəzilərinin isə təməlqoyma mə­rasimlərində iştirakından söhbət açdı­lar. 

Deputat Sahib Alıyevin sözlərinə görə, Şuşada dövlət başçımızın ulu öndər Heydər Əliyevin 100 illik yubi­leyi ilə bağlı möhtəşəm çıxışında da vurğulandığı kimi, heç kəs bizi yolu­muzdan döndərə bilməz: “İlk növbədə ona görə ki, güclü ordumuz var və bu ordu Prezidentimizin təbirincə desək, “gücünü paradda yox, döyüş meyda­nında göstərib”. Yaxşı olar ki, təkcə haylar deyil, güvəndikləri qüvvələr də müzəffər Ali Baş Komandanımızın bu sözlərindən düzgün nəticə çıxarsınlar”.

Gündəlikdəki birinci məsələni – “İnsan alverinə qarşı mübarizə üzrə Milli Koordinatorun illik məlumatı”nı Daxili işlər nazirinin birinci müavini, polis general-leytenantı Seyfulla Əzi­mov təqdim etdi. General diqqətə çat­dırdı ki, Аzərbаycаndа insаn аlvеrinə qаrşı mübаrizəyə dövlət, hökumət və pаrlаmеnt səviyyəsində verilən böyük dəstək sayəsində 2022-ci ildə də sö­zügеdən əməllərin prоfilаktikаsının və cinayət təqibinin ən yüksək səviyyədə təşkilinə imkan yaradıb.

S.Əzimov “İnsan alverinə qarşı mü­barizə üzrə 2020-2024-cü illər üçün Milli Fəaliyyət Planı”na uyğun olaraq insan alverinə qarşı mübarizənin tək­milləşdirilməsi üçün qanunvericiliyə edilən müvafiq dəyişikliklər, qurbanlar­la işin təkmilləşdirilməsi, aparılan təbli­ğat, mааrifləndirmə işləri barədə məlu­mat verdi. O, hesabat ilində beynəlxalq əməkdaşlığın inkişaf etdirilməsinin də diqqət mərkəzində saxlanıldığını deyərək vurğuladı ki, ABŞ Dövlət De­partamentinin 2022-ci ilin iyun ayında insan alverinə qarşı mübarizəyə dair yayımladığı hesabatda ölkəmizin fəa­liyyəti alqışlanıb və respublikamız bir pillə irəliləyərək 2-ci yeri tutub.

Hesabat ilində həyata keçirilmiş müvafiq əməliyyat-axtarış tədbirlərinin nəticələrini diqqətə çatdıran nazirin birinci müavini 2022-ci ildə 157 insan alveri, 3 məcburi əmək, habelə insan alveri məqsədilə sənədlərlə 44 qanun­suz hərəkət üzrə cinayətin qeydə alın­dığını bildirdi: “Bundan başqa insan alveri cinayəti törətdiklərinə görə, ikisi kişi, on üçü qadın olmaqla, 15 nəfər məhkəmə məsuliyyətinə təqdim edilib. Onların barəsində məhkəmələr tərəfin­dən ittiham hökmü çıxarılmış 12 nəfə­rindən 9-u 7 ildən 10 ilədək, bir nəfər 3 il müddətinə azadlıqdan məhrumetmə cəzasına məhkum olunub. Hesabat ilində 94 insan alveri qurbanı (93 qa­dın, 1 kişi) müəyyən edilib və zərərçək­mişlərin reabilitasiyası, reinteqrasiyası üçün zəruri tədbirlər görülüb”.

Müzakirələrdən sonra İnsan alve­rinə qarşı mübarizə üzrə Milli Koordi­natorun illik məlumatı səsə qoyularaq qəbul edildi.

Sonra S.Qafarova gündəlikdəki 3 məsələnin beynəlxalq müqavilələrin təsdiq edilməsi barədə qanunun la­yihələrinin olduğunu dedi. Müzakirəyə çıxarılmış sənədlərlə bağlı əlavə təklif və rəy olmadığından səsə qoyularaq qəbul edildi. 

Müzakirəyə çıxarılan sənədlər qə­bul edildikdən sonra növbəti 6 məsələ­nin mahiyyətcə eyni olduğunu deyən S.Qafarova qanun layihələrinin Pre­zidentin bir məktubu ilə daxil olduğu­nu bildirdi və müzakirələrdən sonra ayrı-ayrılıqda səsə qoyularaq qəbul edildi. 

Bununla da Milli Məclisin plenar ic­lası başa çatdı.

Əliqismət BƏDƏLOV, “Xalq qəzeti”