ABŞ Prezidenti Co Bayden iki gün əvvəl rəsmi olaraq yenidən prezidentliyə namizədliyini irəli sürdüyünü açıqlayıb. O, video-müraciətində seçiciləri ona administrasiyasının iki il əvvəl başlatdığı “işi bitirmək” üçün daha çox vaxt verməyə çağırıb. Bu barədə “Amerikanın səsi” radisou məlumat yayıb. 

Xatırladaq ki, Bayden 2020-ci il seç­kilərində əsas siyasi rəqibi, respublikaçı prezident Donald Trampı məğlub etmişdi. D.Tramp seçkilərin nəticələrini qəbul et­məmiş, seçki saxtakarlığı ittihamları irəli sürmüşdü. 

D.Trampın bir çox tərəfdarları 2021-ci il yanvarın 6-da Konqresin seçkilərin nəticələrini təsdiqləmək üçün toplaşdığı vaxt Kapitoli binasına zorla daxil olmuş­du. Maraqlıdır ki, Baydenin seçki koman­dası onun yenidən prezident seçilməklə bağlı planlarını açıqladığı zaman Tramp tərəfdarlarının Kapitoliyə hücumunu əks etdirən video görüntüləri paylaşıb.

Bayden həmin görüntülər fonunda ölkə vətəndaşlarına müraciətlə deyib: “Hər bir nəsil amerikalı demokratiyanı müdafiə etməli olduğu bir anla üzləşib. Şəxsi azadlıqları müdafiə edin. Səs ver­mək haqqını və bizim vətəndaş hüquqla­rımızı müdafiə edin”.

Ağ evin hazırkı sahibi sonra respubli­kaçıların aborta çıxışı məhdudlaşdırmaq, sosial təminatı azaltmaq, seçki hüquq­larını məhdudlaşdırmağa çalışdıqlarını söyləyib.

Qeyd etmək lazımdır ki, hələ iki il əv­vəl inauqurasiya olunduğu zaman ölkə­nin ən yaşlı dövlət başçısı olan C.Bayden yeni seçki kampaniyasından öncə yaşı ilə bağlı narahatlıqlara məhəl qoymayıb. Yenidən seçilsə, ikinci vəzifə müddətinə başladığı zaman onun 82 yaşı olacaq.

“Xalq qəzeti”