İqtisadi Əməkdaşlıq və İnkişaf Təşkilatının (OECD) Şərqi Avropa və Mərkəzi Asiya üçün Anti-Korrupsiya Şəbəkəsinin Ekspertlər Qrupu ölkəmizə rəsmi səfərdə olub.

Anti-Korrupsiya Fəaliyyət Planı üzrə V dəyərləndirmə mərhələsi çər­çivəsində Azərbaycanda həyata keçi­rilən tədbirlərin beynəlxalq standartlara uyğunluğunun qiymətləndirilməsi ilə bağlı müzakirələrdə Azərbaycan Res­publikasının Korrupsiyaya qarşı müba­rizə üzrə Komissiyası, Baş Prokurorlu­ğunun struktur qurumları, Baş prokuror yanında Korrupsiyaya qarşı Mübarizə Baş İdarəsi, həmçinin Azərbaycan Respublikası Milli Məclisi və Nazir­lər Kabineti, Ədliyyə, Daxili İşlər, İqti­sadiyyat, Maliyyə Nazirlikləri, Dövlət Təhlükəsizlik Xidməti də daxil olmaqla 20-dən artıq dövlət qurumunun əmək­daşları iştirak etmişlər. 

Dəyərləndirmə mərhələsinin ölkə missiyasının yekunlaşması ilə əlaqə­dar olaraq ekspert qrupunun üzvləri ilə qurumun Anti-Korrupsiya Fəaliyyət Planı çərçivəsində ölkəmiz üzrə Milli Koordinator – Azərbaycan Respublika­sının Baş prokuroru Kamran Əliyevin rəhbərlik etdiyi heyət arasında görüş keçirilib.

Sonra Təşkilatın Şərqi Avropa və Mərkəzi Asiya üçün Anti-Korrupsiya Şəbəkəsinin meneceri xanım Olqa Savran dəyərləndirmə missiyasının yüksək səviyyədə təşkil edilməsini qeyd edib. Ekspertlər Qrupunun rəh­bəri xanım Jolita Vasiliaskuayte yara­dılmış işgüzar şəraitə görə Azərbaycan hökumətinə təşəkkürünü bildirib. 

Xatırladaq ki, səfər çərçivəsində əldə edilmiş məlumatlar əsasında ye­kun ölkə hesabatının hazırlanaraq cari ilin oktyabr ayında Parisdə keçiriləcək müzakirələrdən sonra qəbul edilməsi nəzərdə tutulur.

“Xalq qəzeti”