AMEA Naxçıvan Bölməsinin təşkilatçılığı ilə ulu öndər Heydər Əliyevin anadan olmasının 100 illiyinə həsr olunmuş “Ümummilli lider Heydər Əliyev ideyaları və müasir dövr” mövzusunda respublika konfransı keçirilib.
İştirakçılar əvvəlcə Naxçıvan şəhərindəki Heydər Əliyev Muzeyində dünya şöhrətli siyasətçi və dövlət xadiminin xalqımıza xidmətdə keçmiş həyatını, geniş ictimai-siyasi fəaliyyətini əks etdirən eksponatlarla tanış olublar. Sonra AMEA Naxçıvan Bölməsində təşkil olunan “Ümummilli lider Heydər Əliyev – 100” mövzusunda sərgiyə baxış olub.
AMEA Naxçıvan Bölməsinin sədri, akademik İsmayıl Hacıyev konfransda “Azərbaycanla adı qoşa çəkilən ümummilli lider” mövzusunda məruzə edib. Alim bildirib ki, nadir tarixi şəxsiyyət Heydər Əliyevin parlaq obrazı dünyanın ən tanınmış siyasi xadimləri sırasında bənzərsizliyi və mükəmməlliyi ilə seçilir. Təsadüfi deyil ki, dünya siyasətində həlledici rol oynamış dövlət xadimləri Azərbaycan liderinin dərin zəkasına, universal idarəçilik bacarığına, öz xalqının taleyində oynadığı misilsiz rola heyranlıqlarını bildiriblər. Akademik bəzi dövlət xadimlərinin bu dahi şəxsiyyət barədə söylədikləri fikirlərdən sitatlar gətirərək qeyd edib ki, ölkəmizin dünya siyasət meydanında tanınması dahi rəhbərin yorulmaz və uzaqgörən fəaliyyətinin nəticəsidir.
Konfransda AMEA-nın Fəlsəfə və Sosiologiya İnstitutunun icraçı direktoru, tarix elmləri doktoru Eynulla Mədətlinin “Ümummilli lider Heydər Əliyevin bir millət – iki dövlət düsturu Azərbaycan – Türkiyə birliyinin yol xəritəsidir”, Naxçıvan Dövlət Universitetinin rektoru, dosent Elbrus İsayevin “Ümummilli lider Heydər Əliyevin İpək yolu strategiyası və Azərbaycan”, AMEA Naxçıvan Bölməsi İncəsənət, Dil və Ədəbiyyat İnstitutunun baş direktoru, AMEA-nın müxbir üzvü Əbülfəz Quliyevin “Ümummilli lider Heydər Əliyev və Türk dünyası”, AMEA Naxçıvan Bölməsi Tarix, Etnoqrafiya və Arxeologiya İnstitutunun şöbə müdiri, AMEA-nın müxbir üzvü Vəli Baxşəliyevin “Heydər Əliyevin milli irsimizin tədqiqinə qayğısı” mövzularında çıxışları dinlənilib.
Sonra konfrans öz işini bölmə iclasları üzrə davam etdirib.
Səbuhi HƏSƏNOV,
“Xalq qəzeti”
Naxçıvan