Bu günlərdə sosial şəbəkələrdə ABŞ-ın Ukrayna, Yaxın Şərq və Çinə aid yeni məxfi sənədləri peyda olub. “New York Times”ın məlumatına görə, yeni sızmış sənədlər arasında Ukraynanın hücuma hazırlıqları ilə bağlı məlumatların fotoşəkilləri də var. Hazırda bir çox ölkələrin məmurları informasiyanın yayılmasından dəyən zərəri hesablayırlar. Onlarla səhifədən ibarət məxfi sənəd bu il fevralın 28-də və martın 2-də “Diskord” platformasında dərc edilib.
Məxfi materialların bir hissəsi 100-dən artıq sənədi əhatə edir və ABŞ-ın Ukrayna, Yaxın Şərq, Cənubi Koreya və Çinlə bağlı milli təhlükəsizliyinə aiddir. Sənədlərdən görünür ki, ABŞ istər Rusiya, istər Ukrayna, istərsə də müttəfiq ölkələrin hakimiyyətlərini izləyir. Məsələn, sənədlərdən birində “Tam məxfi” qrifində Rusiya Baş Qərargahının NATO-nun Ukraynaya verdiyi tanklara necə müqavimət göstərmək məsələsi müzakirə olunur. Sənədlərdən görünür ki, ABŞ xüsusi xidmətləri Rusiyanın zərbələri, hücumların məqsədi barədə Kiyevə vaxtında xəbərdarlıq edib və bu da Ukraynaya müdafiə tədbirləri görməyə imkan yaradıb.
Sənədlərdən birinə əsasən, ABŞ kəşfiyyatı Rusiya Müdafiə Nazirliyinin fevralın konkret günündə Ukrayna ordusunun iki yerdəki mövqelərinə zərbə endirmək planından xəbər tutub. ABŞ kəşfiyyatı həm də rus hərbçilərinin Ukraynadakı onlarla energetika obyektinə və eyni sayda körpülərə zərbə hazırladıqlarından da əvvəlcə xəbərdar olub.
Kəşfiyyatın hesabatlarından bəlli olur ki, Birləşmiş Ştatlar Ukraynanın hərbi və siyasi rəhbərliyini də izləyir. Bu, Vaşinqtonun Ukraynanın hərbi strategiyası haqqında dolğun təsəvvür əldə etmək səylərini əks etdirir. Qəzet yazır: “Bu materiallar kəşfiyyat nümayəndələrinin çoxdan səsləndirdiyi belə bir ideyanı təsdiq edir: ABŞ Rusiyanın hərbi əməliyyatları haqqında daha dəqiq təsəvvürə malikdir, nəinki Ukraynanın planları haqqında”.
Sosial şəbəkələrə sızmış faktlar arasında müharibədən əlavə, ABŞ-ın müttəfiqləri, xüsusən Cənubi Koreya haqqında məlumatlar da yer alıb.
Paşa ƏMİRCANOV, “Xalq qəzeti”