Azərbaycan Mətbuat Şurası ilə Mediasiya Şurası arasında Anlaşma Memorandumu imzalanıb. Bu barədə “Xalq qəzeti”nə məlumat Mətbuat Şurasından daxil olub.

Məlumatda bildirilib ki, imzalanmış sənədlə bağlı keçirilmiş toplantını giriş sözü ilə MŞ sədri Rəşad Məcid açıb. Deyib ki, rəhbərlik etdiyi qurumla Me­diasiya Şurasını birləşdirən, müəyyən mənada, ortaq fəaliyyəti təsdiqləyən bir neçə məqam var. Bunlardan birin­cisi odur ki, hər iki qurum cəmiyyətyö­nümlüdür, barışdırıcı missiya daşıyır. Mətbuat Şurası media ilə ictimaiyyətin müxtəlif təbəqələrinə məxsus şəxslər arasında kompromis variantların axta­rışını, Mediasiya Şurası isə ümumən, vətəndaşlar arasında mübahisə­li məsələlərin aradan qaldırılmasını hədəf seçib. İkinci məqam hər iki qu­rumun məhkəmələrin yükünün azal­dılmasına xidmət edən fəaliyyəti ilə bağlıdır. 

Mətbuat Şurası ilə Mediasiya Şurası arasında Anlaşma Memorandumu mət­ninin hazırlanmasında iştirak etmiş MŞ İdarə Heyətinin üzvü, “Xalq cəbhəsi” qəzetinin baş redaktoru Elçin Mirzəbəyli deyib ki, ümumən, mediasiya anlayışı­nın cəmiyyətdə təbliğinə ehtiyac var. O, sənədin bu baxımdan faydalı olacağına inandığını deyib. 

Mediasiya Şurası İdarə Heyətinin sədri Nadir Adilov rəhbərlik etdiyi qu­rumun fəaliyyətindən söz açıb. Bildirib ki, qısa müddətdə əldə edilmiş bütün uğurlarda media orqanlarının apardıq­ları təbliğatın payı böyükdür. Bu təbliğat Mediasiya Şurasına inam və etimad formalaşdırmaq zəminində idi və xey­li müsbət nəticələr əldə etməyə imkan verdi. 

N.Adilov vurğulayıb ki, Mediasiya Şurasının ötən il müxtəlif vətəndaşlar arasında barışıq yaratma göstəricisi 39 faiz olub. Bu isə əvvəlki hesabat ili ilə müqayisədə dəfələrlə çoxdur. Şuranın əsasən əmək, kommersiya, ailə-məişət məsələləri ilə əlaqədar mübahisələrin aradan qaldırılması istiqamətində ça­lışdığını diqqətə çatdıran Nadir Adilov çıxışında, həmçinin media təmsilçilə­rinin mediator fəaliyyəti göstərməsinin daha uğurlu nəticələr verdiyini diqqətə çatdırıb. 

Mətbuat Şurasının sədri Rəşad Mə­cid bildirib ki, cəmiyyətdə mediasiya ilə əlaqədar maarifləndirmə işlərinin aparıl­ması üçün media orqanlarının mövcud istiqamətdəki fəaliyyətinin müəyyən qə­dər stimullaşdırılmasına ehtiyac duyulur ki, bu baxımdan hər iki qurumun ataca­ğı ilk birgə addım jurnalistlər arasında yazı müsabiqələrinin təşkili ola bilər. 

R.AMİN