Ötən il Azərbaycan “Ekstradisiya haqqında” Avropa Konvensiyasının təslimetmə prosedurunun effektivliyinin artırılmasına xidmət edən Dördüncü Əlavə Protokolu ratifikasiya edib, bu sahədə səmərəli əməkdaşlıq aparılır. İkinci Əlavə Protokolun əhəmiyyəti nəzərə alınaraq ölkəmizin həmin sənədə qoşulması qərara alınıb.

Azərbaycan dövləti adından bu sənədi imzalamaq üçün ədliyyə naziri Fikrət Məmmədov Strasburqda olub, Avropa Şurası Baş katibinin müavini Byorn Berqenin və digər məsul şəxs­lərin iştirakı ilə həmin protokolun imza­lanması mərasimi keçirilib.

Görüşdə ədliyyə naziri Avropa Şu­rası ilə əməkdaşlıqda ölkəmiz üçün 2022-2025-ci illər üzrə qəbul edilmiş Fəaliyyət Planının implementasiyası çərçivəsində Avropa Məhkəməsi qə­rarlarının icrası ilə bağlı layihənin hə­yata keçirildiyini vurğulayıb. Nazirin əd­liyyə, o cümlədən penitensiar, habelə məhkəmə sistemində aparılan və bey­nəlxalq aləmdə təqdir olunan islahatlar və yeniliklər barədə verdiyi məlumat maraqla qarşılanıb.

Baş katibin müavini B.Berqe Avro­pa Şurasının ölkəmizlə əməkdaşlığının yüksək səviyyəsini qeyd edərək, may ayında quruma üzv dövlətlərin başçıla­rının sammitinin keçiriləcəyini bildirib.

Səfər çərçivəsində Strasburqda İn­san Hüquqları üzrə Avropa Məhkəmə­sinin sədri xanım Siofra O’Liri ilə də ikitərəfli görüş keçirilib.

Keçirilən görüşlərdə Azərbayca­nın Avropa Şurası yanında daimi nü­mayəndəsi Fəxrəddin İsmayılov və Avropa Məhkəməsinin Azərbaycandan olan hakimi Lətif Hüseynov iştirak edib­lər.

“Xalq qəzeti”