Dünən Pekində İran və Səudiyyə Ərəbistanının xarici işlər nazirləri Hüseyn Əmir Abdullahiyan və Feysəl ibn-Fərhan arasında görüş keçirilib. İki ölkə öz aralarında diplomatik müasibətləri bərpa etdikləri barədə bəyanat veriblər. Bəyanata əsasən, səfiliklər və konsulluqlar qarşılıqlı olaraq yaxın iki ay ərzində açılacaq. İki ölkənin xarici işlər nazirlərinin Çinin vasitəçiliyi ilə görüşündə belə bir nəticə əldə olunub. Bu, İran və Səudiyyə XİN başçıları arasında ilk birbaşa görüş olub. Məlumatı “Euronews” verib. 

Qeyd edək ki, bu ölkələr arasında münasibətlər 2016-cı ildə pozulub. O vaxt Tehran və Ər-Riyad Yəməndəki mü­naqişə ilə bağlı bir-birinə zidd mövqe tutublar. Səudiyyə Ərə­bistanında terrorizmə dəstək verməkdə ittiham olunan şiə din adamı öldürülüb və Teh­randa isə krallığın səfirliyi hü­cuma məruz qalıb. 

“Əl-Ərəbiyyə”nin məlu­matına görə, iki ölkənin xarici işlər nazirləri birgə bəyanatda uçuşların və vizaların verilmə­sinin bərpa olunduğunu, səfir­lik və konsulluqların yenidən açılması prosesinin başladığı­nı bildiriblər. Birgə bəyanatda rəsmilər və ikitərəfli nümayən­də heyətləri arasında görüşlə­rin davam etdiriləcəyi və 2001-ci ildə imzalanmış təhlükəsizlik sazişinin bərpa olunacağı elan edilib.

Xatırladaq ki, bir bu il fev­ralın 15-də İran Prezidenti İb­rahim Rəisi də Çində səfərdə olub və çinli həmkarı Si Cinpin­lə görüşüb. Görüşdə iki ölkə li­derləri dostluq münasibətlərini davam etdirmək, ticarət-iqti­sadi əlaqələri dərinləşdirmək barədə razılıq əldə ediblər. 

İran, eyni zamanda, keçən ilin sentyabrında Çin, Rusiya, Pakistan və Hindistanın üzv olduğu Şanxay Əməkdaşlıq Təşkilatına daxil olmaq üçün ərizə verib. 

“Xalq qəzeti”