Son vaxtlar Göygöl rayonunda maraqlı təşəbbüslər irəli sürülür, iməciliklər, ağacəkmə aksiyaları keçirilir və ən başlıcası sakinlər belə tədbirlərdə həvəslə iştirak edirlər. Rayon icra hakimiyyəti rəhbərliyinin bu cür xeyirxah işləri istiqamətləndirməsi, fərqlənənlərin işini qiymətləndirməsi, konkret köməklik göstərməsi bu sahədə ciddi dönüş yaradıb. Ayrı-ayrı əmək kollektivləri, hətta kəndlər sanki bir-biri ilə yarışa qoşulub. 

Bu günlərdə Göygöl Dövlət Aqrar İnkişaf Mərkəzi kollektivi tərəfindən ra­yonun Zod kəndində keçirilən ağacəkmə aksiyası buna əyani misaldır. Ümummilli lider Heydər Əliyevin anadan olmasının 100 illik yubileyi münasibətilə təşkil olu­nan ağacəkmə aksiyasına təkcə kollek­tiv, mütəxəssislər deyil, az qala, bütün kənd qoşulub. 

Bu aksiyada yerli şərait üçün əlverişli olan müxtəlif növ ağac tingləri əkilib. 100 nəfər kənd təsərrüfatı mütəxəssisinin iş­tirakı ilə əkilən hər bir ağacın küləkdən qorunması və normal böyüməsi üçün mineral gübrələrdən və digər lazımi va­sitələrdən istifadə edilib, suvarma işləri görülüb. Ümumilikdə isə 3500 ədəd ağac əkilib.

Qeyd edək ki, ölkə Prezidentinin təşəbbüsü ilə son illərdə respublikamız­da ətraf mühitin mühafizəsi və ekoloji təh­lükəsizliyin təmin edilməsi istiqamətində genişmiqyaslı və ardıcıl tədbirlər görülür, müasir parklar, yeni yaşıllıq zolaqları salı­nır, ekoloji siyasət uğurla həyata keçirilir. Göygöl Dövlət Aqrar İnkişaf Mərkəzinin kollektivinin də könüllü olaraq ağacəkmə kampaniyasında fəal iştirak etməsi və bu təşəbbüsə yüzlərlə kənd sakininin qoşul­ması onu göstərir ki, Göygöl rayonunda da ətraf mühitin qorunması və yaşıllıq­ların artırılması ən vacib məsələlərdən biridir. 

Hamlet QASIMOV,
“Xalq qəzeti”nin bölgə müxbiri 

Göygöl rayonu