Dörd gün əvvəl Rusiyanın qırıcı təyyarələri ABŞ-ın Qara dəniz üzərində pilotsuz uçuş aparatını vurub. Bu insident beynəlxalq qalmaqala səbəb olub və iki ölkə arasındakı gərgin vəziyyəti daha da ağır duruma salıb. Ekspertlərin fikrincə, insident hətta böyük müharibəyə səbəb ola bilərdi.
Bu arada Pentaqon Rusiya təyyarələrinin ona məxsus pilotsuz uçuş aparatına yaxınlaşmasını göstərən video yayımlayıb. “Amerikanın səsi” radiosu xəbər verir ki, videoda Rusiyaya məxsus “Suxoy Su-27”nin ABŞ-ın “MQ-9” pilotsuz təyyarəsinə arxadan yaxınlaşdığını, sonra isə üzərindən keçərkən yanacaq atdığını görmək olub. İkinci “Suxoy Su-27” təyyarəsi də oxşar şəkildə yaxınlaşır və ABŞ-ın pilotsuz təyyarəsinə çataraq, onunla toqquşduğu anda video yayımı pozulur. Videonun bərpa edildiyi son kadrda pilotsuz təyyarənin qanadlarından birinin əyildiyini görmək mümkün olub.
Qeyd edək ki, video ABŞ-ın müdafiə naziri Lloyd Ostinin rusiyalı həmkarı Sergey Şoyqu ilə görüş barədə danışdıqdan bir gün sonra yayılıb. Pentaqon rəhbəri deyib: “Birləşmiş Ştatlar beynəlxalq hüququn icazə verdiyi yerdə uçmağa və fəaliyyət göstərməyə davam edəcək və Rusiya öz hərbi təyyarələrini təhlükəsiz və peşəkar şəkildə idarə etməlidir”.
Yeri gəlmişkən, 2021-ci il fevralın 24-də Rusiyanın Ukraynada hərbi əməliyyata başlamasından sonra L.Ostin və S.Şoyqu arasında telefon təmasları kəskin azalıb. Rəsmilər bunun iki müdafiə naziri arasında ötən ilin oktyabrından sonra ilk telefon danışığı olduğunu deyib.
ABŞ ordusunun məlumatına görə, bu ölkəyə məxsus “MQ-9” pilotsuz təyyarə çərşənbə axşamı beynəlxalq hava məkanında adi əməliyyatlar həyata keçirirdi. ABŞ-ın hərbi hava qüvvələri pilotsuz uçuş təyyarəsi Rusiya qırıcıları tərəfindən zədələndikdən sonra onu vuraraq yerə salıb.
ABŞ Birləşmiş Qərargah Rəisləri Komitəsinin sədri, general Mark Milli insidentdən bir gün sonra, yəni çərşənbə günü jurnalistlərə bildirib: “Biz bilirik ki, müdaxilə qəsdən olub. Biz bilirik ki, aqressiv davranış qəsdən olub. Biz bunun çox qeyri-peşəkar və çox təhlükəli olduğunu da bilirik”.
Rusiya hələlik pilotsuz uçuş aparatının qalıqlarını geri qaytarmayıb. Rusiya Müdafiə Nazirliyindən bu barədə son qərar qəbul edildikdən sonra məlumat veriləcəyini bildiriblər.
ABŞ rəsmilərinin dediyinə görə, Pentaqonun mütəxəssisləri pilotsuz uçuş aparatı Qara dənizə göndərilməzdən əvvəl Rusiya tərəfi məxfi məlumatları əldə etməsin deyə, ondakı həssas proqram təminatını uzaqdan siliblər.
M.HACIXANLI, “Xalq qəzeti”