Qərb mətbuatı Türkiyə Prezidenti, qarşıdakı seçkilərdə ölkə prezidentliyinə ən real namizəd Rəcəb Tayyib Ərdoğanın əleyhinə təbliğata başlayıb. Artıq Avropanın ən nüfuzlu media orqanlarında bu barədə hədyanlar yazılır. Məqsəd, təbii ki, Türkiyədə, bütün türk dünyasında, eləcə də beynəlxalq arenada böyük nüfuz və sanbal qazanmış Ərdoğanın seçilməsinə mane olmaqdır. Amma bu məqsədin həyata keçməsi üçün Türkiyə lideri ilə bağlı neqativlər tapmaq elə də asan deyil. Ona görə də əsasən yalan və saxta informasiyalar buraxılır.
Belə informasiyalardan birinə bu günlərdə “Eurenews”də rast gəldik. Saytın “Almaniyada türk diasporu seçkiləri gözləyir” yazısında Ərdoğan əleyhinə reallığı əks etdirən bir cümləyə belə rast gəlmək mümkün deyil. Yazıda belə bir fikir aşılanır ki, Türkiyədən Almaniyaya miqrasiya edənlər ölkədəki “qarşıdurmalar, repressiyalar və təqiblər” səbəbindən ölkəni tərk edirlər. Hətta riyakarcasına bildirilir ki, 2016-cı il dövlət çevrilişinə cəhddən sonra Almaniyaya gələn türk qaçqınların sayı kəskin artıb. Almaniya DİN-in məlumatına görə, guya o vaxtdan bəri 21 min türk ölkədə sığınacaq, yaxud qaçqın statusu alıb. Amma bu il mayın 14-də Türkiyədə ümumxalq seçkiləri keçiriləcək, guya Qərb ekspertlərinin fikrincə, bu, Ərdoğanın partiyasının 20 illik hakimiyyətinə son qoyacaq və türk diasporunun bir çox üzvlərinin evlərinə qayıtmasına imkan yaranacaq.
Açıq-aşkar feyk görünür, bu cür məlumatlar yaymaqla məqsəd təkcə Ərdoğanı “vurmaq” deyil, həm də türk miqrantlarını vətənlərinə qaytarmaq niyyəti güdülür. Bu baxımdan, birincisi, qeyd etməliyik ki, türklərin Almaniyaya miqrasiyası təzə məsələ deyil. Hətta müəyyən dövrlərdə türk işçi qüvvəsinin bu ölkəyə cəlb edilməsi ilə bağlı xüsusi proqram da həyata keçirilib. Bundan əlavə, 2015-ci ilin məlumatına görə, türklər Almaniyada ən çoxsaylı xaricilər olub, ölkədəki bütün əcnəbilərin 17 faizini təşkil edib. Həmin tarixə qədər türk diasporunun illik təbii artımı 1,2-1,5 faiz təşkil edib. Ondan əvvəl, 2005-ci ildə 840 min türk Almaniya vətəndaşı olubsa, 2009-cu ildə onların sayı 2 milyon 812 minə çatıb. Hazırda isə ölkədə 4 milyondan artıq türk yaşayır.
Təbii ki, sonrakı dövrlərdə də zaman-zaman insanların Qərbə, eləcə də Almaniyaya miqrasiyası davam edib. Bu gün də istisna deyil. Qərbin Yaxın Şərqdə törətdiyi “demokratik inqilablar” ərəblərin də Avropaya kütləvi miqrasiyasına səbəb olub. Bu kimi məsələləri 2016-cı ilin dövlət çevrilişinə cəhdi ilə əlaqələndirmək ən azı siyasi naşılıqdır. Bəli, həmin vaxt Qərb Türkiyədə dövlət çevrilişi həyata keçirmək istəyib və Ərdoğanı hakimiyyətdən salmaq üçün qanlı bir hərəkata yol verib. Amma alınmayıb. “Euronews” isə bu barədə danışmaq istəmir. Demir ki, o vaxt Ərdoğanı devirə bilmədik, indi də bir daha cəhd edəcəyik. Sayt Qərbin əlinin neçə yüz türkün qanına (eləcə də son illərdə milyonlarla ərəbin günahsız qanına) bulaşdığını açıb-ağartmaq istəmir. Əvəzində feyk xəbərlərlə əks-təbliğat aparır. Amma inanırıq ki, türk insanı yaxşı-yamanın yerini bilir, dost-düşməni tanıyır. Bununla yanaşı, Prezident Ərdoğanın dünyaya ədalət yayan siyasətini də türk insanı yaxşı başa düşür. Ona görə də Qərbin bu istiqamətdə səylərinin yenə boşa çıxacağına əminik. Elə 2016-cı ildə olduğu kimi.
Təəssüf ki, Qərbdə gedən bu təbliğata – Ərdoğanın hakimiyyətdən gedəcəyinə sevinənlər də yox deyil. Ermənistanda təbii ki, belələri kifayət qədərdir. Odur ki, Türkiyədə mayın 14-də keçiriləcək prezident və parlament seçkiləri Ermənistanda diqqətlə izlənilir və Ərdoğanın uduzmasında maraqlı olan qüvvələr sevinclərini gizlədə bilmirlər. Bu günlərdə “Armenian Reрort”da dərc edilən məqalədə bildirilib ki, Ərdoğan erası “bitmək üzrədir” və bu, Ermənistan üçün olduqca yaxşı xəbərdir: “CHP lideri, “Altılı masa”nın prezidentliyə namizədi Kamal Kılıçdaroğlu 2023-cü ilin may seçkilərində Türkiyə lideri Rəcəb Tayyib Ərdoğana qalib gələ bilər. Bunu “ORC Araşdırma” agentliyinin son rəy sorğusu da təsdiqləyir. Sorğu 4-6 martda 1850 respondent arasında keçirilib, Ərdoğan 43,2, Kılıçdaroğlu isə 56,8 faiz səs toplayıb. Amma agentliyin yanvar ayında keçirdiyi sorğuda Ərdoğan Kılıçdaroğlu da daxil olmaqla, bütün rəqiblərini üstələyirdi”.
Müəllifin fikrincə, ABŞ Prezidenti Co Bayden də Türkiyə liderinin seçkilərdə məğlub olmasında maraqlıdır. Amma əsas məsələ odur ki, Ərdoğanın uduzması Ermənistan üçün xüsusi şans aça bilər. Çünki Ərdoğanın 2020-ci ilin payızında göstərdiyi siyasi iradə Azərbaycanın İkinci Qarabağ müharibəsində qalib gəlməsində müstəsna rol oynayıb. Üstəlik, Ərdoğan həmin il dekabrın 10-da Bakıya gedərək, Qələbə paradında iştirak edib: “Böyük ehtimal var ki, Əliyev tək qalacaq, onu ciddi şəkildə dəstəkləyən İmran Xan (Pakistanın baş naziri) da artıq hakimiyyətdə deyil. Kılıçdaroğlu ABŞ nə əmr etsə, onu da icra edəcək. ABŞ isə demokratiyanı dəstəkləməkdə maraqlıdır ki, bu da Ermənistan üçün böyük pəncərə açır. Məsələn, Türkiyə ilə quru sərhədlər də münasib şərtlərlə açılacaq, həm də Azərbaycanın mövqeyi nəzərə alınmadan. Ərdoğanın gedişi Azərbaycanın “Xankəndidə bayraq qaldırmaq” məqsədini də puça çıxaracaq... Bakı ilə Tehran arasında tamamilə gərgin münasibətləri nəzərə alsaq, Azərbaycanın regionda, sadəcə olaraq, müttəfiqi qalmayacaq”.
Belə yerdə deyirlər, yavaş ye, boğazında qalar. Təbii ki, bütün bu məsələlər, Türkiyədə deyildiyi kimi, “sandıq başında” həll ediləcək. Prezident Ərdoğanın bu illər ərzində gördüyü nəhəng işlər, ölkədə iqtisadiyyatın sürətli inkişafı, sənayenin, eləcə də hərbi sənayenin böyük hədəfləri aşması, bütün türk dünyasında bütövlüyün yaranması və s. və i.a. “sandıqdan” Ərdoğanın çıxacağını şərtləndirir. Üstəlik, bugünlərdə TDT-nin Ankara Zirvə görüşündə Özbəkistan Prezidenti Şavkat Mirziyoyev Ərdoğanın Nobel mükafatına təqdim olunmasını təklif edib. Rusiya isə Ərdoğanın yüksək səviyyəli sülhyaratma səylərini nəzərə alaraq, bu təklifi dəstəkləyəcəyini bəyan edib. Bu da Ərdoğan üçün daha bir dividentdir.
Paşa ƏMİRCANOV, “Xalq qəzeti”