Suriya Prezidenti Bəşər Əsəd Moskvaya işgüzar səfərə gedib. Martın 14-də axşam saatlarında onu Vnukovo aeroportunda RF Prezidentinin Yaxın Şərq və Afrika üzrə xüsusi nümayəndəsi, RF XİN başçısının müavini Mixail Boqdanov, Suriyanın Moskvadakı səfiri Bəşər Cəfəri və Rusiyanın Suriyadakı səfiri Aleksandr Yefimov qarşılayıblar. Dünən Əsəd Aleksandrov bağında naməlum əsgərin məzarına gül çələngi qoyub. Məlumatı TASS verib.
Dünən Əsəd Kremldə Rusiya Prezidenti Vladimir Putinlə görüşüb. RF Prezidentinin mətbuat xidmətinin məlumatına görə, görüş zamanı Rusiya və Suriya arasında siyasi, ticarət-iqtisadi və humanitar sahələrdə əməkdaşlığın inkişafı, eləcə də Suriya ətrafında vəziyyətin kompleks nizamlanması perspektivləri müzakirə olunub.
Rusiya analitiklərinin fikrincə, Əsədin səfəri ekstraordinar xarakter daşıyır və Yaxın Şərqdə yeni perspektivlərlə bağlı Rusiya ilə birgə strategiyanın işlənməsinə hesablanıb.
Paşa ƏMİRCANOV, “Xalq qəzeti”
