Milli Məclisin sədri Sahibə Qa­farova dünən ölkəmizdə səfərdə olan Rusiya Federasiyası Dağıstan Respublikası Milli Şurasının sədri Zaur Askendərovun başçılıq etdiyi nümayəndə heyəti ilə görüşüb.

Parlamentin sədri Dağıstan və Azər­baycan xalqları arasındakı tarixi əlaqələr­dən, ümumi dəyərlərdən danışıb və bu münasibətlərin bu gün də uğurla davam etdirildiyni diqqətə çatdırıb. O, Azərbay­canla Rusiya Federasiyası arasında münasibətlərin inkişafında dövlət başçı­larının xüsusi rolunu qeyd edərək qarş­lıqlı səfərlərin bu münasibətlərə böyük töhfələr verdiyini bildirib. Qeyd olunub ki, Rusiya Federasiyasının subyektləri, o cümlədən Dağıstan Respublikası ilə Azərbaycan arasında uğurlu əməkdaşlıq əlaqələri, bu sahədə parlamentlərarası münasibətlərin özünəməxsus rolu var. 

S.Qafarova Rusiya Federasiyası Federasiya Şurası və Dövlət Duması ilə Azərbaycan Respublikası Milli Məc­lisi arasında mövcud ikitərəfli əlaqələr haqqında məlumat verib. O, ötən ilin dekabr ayında Dağıstan Respublikasının rəhbəri Sergey Melikovun ölkəmizə səfə­rini və onunla keçirdiyi görüşü xatırladıb, həmin səfərin ikitərəfli münasibətlərin inki­şafı baxımından əhəmiyyətini vurğulayıb.

Rusiya Federasiyası Dağıstan Res­publikası Milli Şurasının sədri Zaur Askendərov Dağıstan və Azərbaycan xalqlarının yaxınlığından, bölüşdükləri ümumi dəyərlərdən danışıb. O, Dağıstan­da Azərbaycanın ümummilli lideri Heydər Əliyevin, Azərbaycanda isə Dağıstanın böyük şairi Rəsul Həmzətovun 100 illik yubileylərinin keçirilməsinə hazırlıq get­diyini və bunun iki xalq arasındakı bağ­lılığın bariz nümunəsi olduğunu diqqətə çatdırıb. Qonaq Prezident İlham Əliyevin rəhbərliyi ilə Azərbaycanın dinamik inki­şaf etdiyni diqqətə çatdırıb və Dağıstanın Azərbaycanla bütün sahələrdə əlaqələrin daha da gücləndirilməsinə böyük önəm verdiyini deyib. 

Parlamentlərin qarşılıqlı münasibət­lərin inkişafında oynadığı roldan danışan qonaq qanunvericilik sahəsində təcrübə mübadiləsinin daha yaxşı qanunlar ya­ratmağa kömək edəcəyinə inamını ifadə edib. Z.Askendərov digər xalqların nü­mayəndələri ilə yanaşı, azərbaycanlıların da Dağıstanda vahid ailə kimi yaşadıqla­rını məmnunluqla qeyd edib. 

Söhbət zamanı qarşılıqlı maraq do­ğuran digər məsələlər ətrafında da fikir mübadiləsi aparılıb.