Veysəloğlu Şirkətlər Qrupuna daxil olan “Veysəloğlu Distribusiya” şirkətinin təşkilatçılığı və Milli Hematologiya və Transfuziologiya Mərkəzinin Qan Bankının təşəbbüsü ilə qanvermə aksiyası keçirilib. Talassemiyalı uşaqlara dəstək məqsədilə “Qan ver, Həyat ver!” şüarı altında keçirilən aksiyada “Veysəloğlu Distribusiya” şirkətinin 100-dən artıq əməkdaşı iştirak edib.

Mütəmadi olaraq əməkdaşları ilə qanvermə aksiyalarında iştirak edən “Veysəloğlu Distribusiya” şirkəti fəaliyyətində sosial məsuliyyət layihələrinə xüsusi həssaslıqla yanaşır və bu sahədə aktivlik göstərir.

“Veysəloğlu Distribusiya” şirkəti fəaliyyətinə 1994-cü ildə Türkiyədən qida məhsullarının idxalı ilə başlayıb və Veysəloğlu Şirkətlər Qrupunun təməli bu şirkət ilə qurulub. 1997-ci ildən etibarən şirkət öz fəaliyyətini genişləndirərək dünyanın bir çox tanınmış markalarının nümayəndəliklərini alıb və hazırda 3500-dən çox çeşiddə məhsulun ölkə üzrə distribusiyasını həyata keçirir. Şirkət Bakıda yerləşən baş ofisi ilə yanaşı, Mingəçevir və Salyanda yerləşən regional ofisləri və 2500-ə yaxın əməkdaşı ilə xidmət göstərir.

“Veysəloğlu Şirkətlər Qrupu” pərakəndə, logistika, distribusiya və istehsalat sahələrində fəaliyyət göstərir. Bu yaxınlarda dünyada tanınmış “Deloitte” şirkətinin Azərbaycanda ilk dəfə olaraq təşkil etdiyi nüfuzlu “Best Managed Companies” müsabiqəsində “Veysəloğlu Şirkətlər Qrupu” qaliblərdən biri elan edilib.