Dünən Sahibə Qafarovanın sədrliyi ilə Milli Məclisin 2023- cü il yaz sessiyasının növbəti iclası keçirildi. Sədr əvvəlcə martın 5-də erməni silahlı birləşmələri tərəfindən qanunsuz istifadə edilən Xankəndi–Xəlfəli–Turşsu yolunda törədilmiş təxribat barədə məlumat verdi. Bildirdi ki, bu hadisə Azərbaycan, Ermənistan və Rusiya rəhbərlərinin 2020-ci il 10 noyabr tarixli üçtərəfli Bəyanatının bütün bəndlərinin tamamilə və qeyd-şərtsiz yerinə yetirilməsi zərurətini bir daha göstərir. 

S.Qafarova dedi ki, bu təxribatın qar­şısının alınması zamanı bizim iki əsgəri­miz şəhid olmuşdur. Həmçinin yaralanan hərbçimiz var. Deputatlar erməni silahlı birləşmələrinin törətdikləri təxribatları pislədilər. 

Plenar iclasın gündəliyinə 13 məsələ daxil edilmişdi. Sonra Azərbaycan Res­publikasının İnsan hüquqları üzrə Müvək­kilinin (ombudsmanın) illik məruzəsi din­lənildi.

“Sosial sığorta haqqında” və “İşsiz­likdən sığorta haqqında” Azərbaycan Respublikasının qanunlarında dəyişiklik edilməsi barədə qanun layihələrinin qəbu­lundan sonra Azərbaycan Respublikasının İnzibati Xətalar Məcəlləsində dəyişiklik edilməsi haqqında qanun layihəsi üçüncü oxunuşda təqdim edildi. Layihədə diqqət çəkən məqamlardan biri də Azərbaycanda jurnalistlərin peşəkar fəaliyyətinə qanun­suz müdaxilə edənlərin 600 manatadək cə­rimələnməsinə dair dəyişiklik idi. Bununla bağlı İnzibati Xətalar Məcəlləsinə dəyişik­lik layihəsi III oxunuşda qəbul edildi. 

Azərbaycan Respublikasının Vergi Məcəlləsində dəyişiklik edilməsi haqqında Azərbaycan Respublikası qanununun la­yihəsi üçüncü oxunuşda qəbul edildi. Bu­nunla da Azərbaycanda media subyektlə­rinin əldə etdikləri gəlirlərin vergidən azad olunması məsələsi təsdiqləndi. 

Qanun layihəsinə əsasən, media sub­yektlərinin (kütləvi informasiyanın dərc olunması və (və ya) yayımlanması olan fiziki (jurnalistlər istisna olmaqla) və ya hüquqi şəxslərin) öz fəaliyyətləri nəticə­sində əldə etdikləri gəlirlərin, o cümlədən reklam gəlirlərinin gəlir vergisindən, mən­fəət vergisindən və sadələşdirilmiş vergi­dən azad edilməsi təklif edildi. Məcəlləyə dəyişiklik 2023-cü il yanvarın 1-dən tətbiq olunmaqla 3 il müddətində qüvvədə olacaq və audiovizual media subyektlərinə şamil olunmayacaq.

Gündəliyə çıxarılan digər qanun la­yihələrinin müzakirəsindən sonra müvafiq qərar qəbul edildi. 

İclasın sonunda Milli Məclisin Səd­ri deputatları Yel çərşənbəsi və 8 Mart Beynəlxalq Qadınlar Günü münasibətilə təbrik etdi. 8 Mart Qadınlar Günü münasi­bətilə Azərbaycan Respublikasının Birinci vitse-prezidenti Mehriban xanım Əliyeva­ya Milli Məclis adından təbrik məktubu göndərildi.

Bununla da Milli Məclis öz işini başa çatdırdı.

Əliqismət BƏDƏLOV,
“Xalq qəzeti”