Dünən Ukraynada Rusiyanın hücumları davam edib. Əsas döyüşlər yenə Baxmut istiqamətində gedib. Ukrayna Hava Hücumundan Müdafiə Qüvvələrinin Rusiyaya məxsus 13 pilotsuz uçuş aparatını məhv etdiyi bildirilir. Məlumatı UNİAN verib.
Hava Qüvvələrinin rəsmisi Yuri İqnat bildirib ki, rus ordusu ilkin olaraq 15 PUA buraxıb, onlardan 13-ü hava hücumundan müdafiə qüvvələri tərəfindən məhv edilib.
Rusiya tərəfi isə Ukrayna ordusunun Kursk vilayətinin Xomutov rayonu ərazisini atəşə tutduğunu bəyan edib. Bu barədə Kursk qubernatoru Roman Starovoyt məlumat verib: “Ukrayna ordusu Xomutov rayonunun sərhədyanı ərazisini atəşə tutub. Atəş nəticəsində elektrik təminatı obyektləri dağılıb, İskra kəndi işıqsız qalıb”.
Avropa Komissiyası isə dünən Kiyevə fövqəladə dəstək paketi çərçivəsində silah almaq üçün 1 milyard avro ayrılacağını bildirib. Bu qərar Baxmutda yaranmış çətin vəziyyətlə əlaqədar qəbul edilib.
Paşa ƏMİRCANOV, “Xalq qəzeti”