Son illərdə ölkədə su ehtiyatlarından səmərəli istifadənin və su təsərrüfatı obyektlərinin idarə olunmasının təkmilləşdirilməsi, müasir tələblərə cavab verən meliorasiya və su təsərrüfatı obyektlərinin qurulması, eləcə də bu sahədə uçot və nəzarətin təkmilləşdirilməsi istiqamətlərində ardıcıl tədbirlər görülür. 

Bütün bunlarla bərabər, son dövrlərdə müşahidə edilən qlobal iqlim dəyişikliyi, dünyada orta temperaturun yüksəlməsi, qonşu ölkələrdən daxil olan yerüstü su ehtiyatının azalması, digər tərəfdən, suya tələbatın artması məhdud su ehtiyatları­na malik olan ölkəmizdə sudan səmərəli istifadə üçün təxirəsalınmaz layihələr hə­yata keçirilməsini zəruri edib. Bu məqsəd­lə Prezident İlham Əliyevin tapşırığına əsasən, su ehtiyatlarından səmərəli istifa­də edilməsi ilə bağlı yaradılan Dövlət Su Komissiyası müvafiq tədbirləri uğurla gerçəkləşdirir. Həmin layihələrdən biri də Yengicə su anbarının tikintisidir. Bu infrastrukturun inşasında əsas məqsəd su ehtiyatlarının artırılması, əkinə yararlı tor­paqların genişləndirilməsi, müasir təsərrü­fatların qurulmasıdır. 

Çay hövzəsində qurulan Yengicə su anbarı bəndinin ümumi uzunluğu 449,5 metrə, hündürlüyü isə 45 metrə çatacaq. Anbar istifadəyə verildikdən sonra 15 kən­din ərazisində fəaliyyət göstərən 3 minə yaxın fermer təsərrüfatının su təminatı ta­mamilə yaxşılaşacaq. Ümumilikdə su an­barı tikildikdən sonra Qəbələ rayonunun aran hissəsində 10 min hektar yeni torpaq sahəsinin suvarılması tam təmin olunacaq. Bu isə həmin torpaqlarda məhsuldarlığı artırmaqla yanaşı, təkrar əkin aparılmasına da imkan yaradacaq.