Bölgədə 10 önəmli özəl layihəyə 21,6 milyon manat güzəştli kredit verilib

Son illər respublikamızda özəl sektorun inkişafı məqsədilə mühüm layihələr həyata keçirilir, investisiya təşviqi mexanizminin tətbiqi uğurla davam etdirilir, iş adamlarının xərclərinin azalması üçün onlara prioritet sahələr üzrə güzəştli kreditlərin ayrılması diqqətdə saxlanılır. 

Güzəştli kreditlər qeyri-neft sektorun­da sənaye istehsalı və emalı, o cümlədən aqrar emal, kənd təsərrüfatı, anbar komp­leksləri, logistika xidməti, akvakultura, yaşıl və innovasiya yönümlü layihələrin icrasına yönəldilir. Sahibkarlığın İnkişafı Fondu İdarə Heyətinin sədri Osman Xali­yevin sözlərinə görə, qurum 2002-ci ildən indiyədək 49 min 500 layihəyə, ümumilik­də, 3,2 milyard manat məbləğində güzəşt­li kredit verib, 2022-ci ildən isə Qarabağ və Şərqi Zəngəzur iqtisadi rayonlarında investisiya layihələri həyata keçirən sahi­bkarlara 10 layihə üzrə 21,6 milyon manat güzəştli kredit ayırıb. 

Azad edilmiş ərazilərdə fəaliyyət göstərən sahibkarların bank və bank ol­mayan kredit təşkilatlarından əldə etdik­ləri vəsaitin 90 faizədək hissəsinə döv­lət zəmanətinin verilməsi qərara alınıb. Bu kreditlər üçün 15 faiz dərəcəsi həddi müəyyənləşdirilib. Bunun da 10 faizinin fondda subsidiyalaşdırılması nəzərdə tutu­lub. Eyni zamanda, ayrılan kreditə 36 aya qədər güzəşt müddəti tətbiq edilib.

Fond Qarabağ və Şərqi Zəngəzur iqti­sadi rayonlarında icra ediləcək layihələr üçün kommersiya bankından alınan kre­ditə dövlət zəmanətini də reallaşdırır. Bu cür layihələr üzrə 3 il ərzində faiz subsi­diyalarının ödənilməsini gerçəkləşdirir. Məsələn, belə layihələr sırasında minatə­mizləmə qurğularının istehsalı və işğaldan azad edilmiş ərazilərdə istifadəsi nəzərdə tutulur. Bu həm ətraf mühit, həm də sosi­al məsuliyyət baxımından mühüm önəm daşıyır.

Sahibkarlığın İnkişafı Fondu artıq cari il fevralın 1-dən bu mexanizm əsasında fəaliyyət göstərir və proses elektron plat­forma vasitəsilə həyata keçirilir. Yəni həm sahibkar, həm bank, həm də fond bütün müraciətlərin baxılması və cavablandırıl­ması, zəmanətin təmin edilməsi, hesabatlı­lığın təşkil olunması kimi məsələlər elekt­ron platforma ilə gerçəkləşdirilir. 

Qurum fəaliyyətində ətraf mühit, sosi­al və korporativ meyarlara diqqət yetirən müəssisələrlə əməkdaşlığı dərinləşdir­məyi hədəfləyir. Eyni zamanda, prioritet istiqamətlər sırasında “yaşıl layihə”lərin maliyyələşdirilməsini də diqqətdə saxlayır. Bu isə fondun fəaliyyətində həm dəstək mexanizmlərinin şaxələndirilməsindən, həm də ümumi iqtisadiyyatda baş verən trendlərlə uzlaşmanın gerçəkləşdirilməsin­dən xəbər verir. Məsələn, son 2 ildə ətraf mühitinin mühafizəsi, emissiya tullantıla­rının atmosferə buraxılmasının azaldılma­sı, “yaşıl” texnologiyalara dair layihələrə daha çox diqqət yetirilməsi məhz belə bir yanaşmanın əyani nümunəsidir. 

Xatırladaq ki, fond indiyədək istehsal müəssisələrində günəş panellərinin quraş­dırılması, elektrik doldurma stansiyaları­nın yaradılması kimi 5 “yaşıl” layihəyə 3,6 milyon manat dəyərində güzəştli kredit verib.