Sentyabr ayında Bakıda arıçılıq məhsullarının 24-cü Respublika Sərgi-Satış Yarmarkası keçiriləcək. Ayın 9-dan-29-dək davam edəcək ənənəvi yarmarkada növbəlilik əsasında ilk qeydiyyatdan keçən 250 arıçı iştirak edəcək.
Kənd Təsərrüfatı Nazirliyinin məlumatına görə, bal yarmarkasında iştirak etmək üçün 2024-cü il iyulun 26-dək arıçılıq təsərrüfatlarını Elektron Kənd Təsərrüfatı İnformasiya Sistemində bəyan edən və minimum 40 arı ailəsi olan fermerlərin müraciəti nəzərə alınacaq. Məlumatda bildirilir ki, bir arıçı yarmarkada maksimum 400 kiloqram bal və maksimum 30 ədəd arı şanı satışa çıxara bilər. Yarmarkada iştirak etmək istəyən arıçılar onlayn qaydada bal.kendden.az saytından qeydiyyatdan keçməlidirlər. İştirakı təsdiqlənən arıçılara SMS-bildirişlər göndəriləcək. Bal nümunələrinin qəbulu isə avqustun 19-dan 27-dək olan müddətdə baş tutacaq. Bal məhsullarının qəbulu zamanı arıçı fermerlər məhsula müvafiq baytarlıq şəhadətnaməsi təqdim etməlidirlər.
Nazirliyin məlumatına əsasən, əvvəlki illərdə olduğu kimi, budəfəki yarmarkada da iştirakçılardan heç bir məbləğ tələb olunmayacaq. Belə ki, arıçılar ödənişsiz satış üçün yer, lazımi ləvazimatlar, marketinq və digər xidmətlərlə təmin olunacaqlar. Yarmarkada satışa çıxarılacaq arıçılıq məhsullarının keyfiyyətinə isə Azərbaycan Qida Təhlükəsizliyi Agentliyi (AQTA) nəzarət edəcək. Məhsullar anbara daxil olduqdan sonra AQTA-nın əməkdaşları tərəfindən istehsalçının iştirakı ilə baldan nümunələr götürüləcək. Analiz üçün götürülmüş həmin nümunələrin nəticələri barədə mütəmadi olaraq təşkilat komitəsinə məlumat veriləcək. Keyfiyyət yoxlanışının nəticələri standartlara uyğun olmayan arıçılıq məhsullarının yarmarkada satışına icazə verilməyəcək.
Yeri gəlmişkən, son illər ölkədə arıçılığın inkişaf etdirilməsi, daxili bazarın keyfiyyətli bal və digər arıcılıq məhsulları ilə təminatının yaxşılaşdırılması, eləcə də bu sahədə ixrac potensialının artırılması üçün fermerlərə lazımi dövlət dəstəyi göstərilir, güzəştli kreditlər verilir. Eyni zamanda Prezident İlham Əliyevin müvafiq fərmanı ilə təsdiq edilmiş “Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi”nə əsasən, kənd təsərrüfatının ənənəvi sahələrindən olan arıçılığın inkişafına dövlət dəstəyinin gücləndirilməsi, bu sahənin potensial imkanlarından səmərəli istifadə edilməsi, kənd əhalisinin sosial rifahının daha da yaxşılaşdırılması məqsədilə Kənd Təsərrüfatı Nazirliyi tərəfindən zəruri işlər görülür. Bütün bunlar isə kənd təsərrüfatının ən gəlirli sahələrindən olan arıçılığa marağı getdikcə artırır. Azərbaycanda istehsal olunan bal isə keyfiyyəti ilə seçildiyi üçün bazar problemi ilə üzləşmir.
Ölkəmizin işğaldan azad edilmiş ərazilərində də arıçılığın inkişaf etdirilməsi üçün əlverişli imkan var. Buna görə də son illər arıçılar təsərrüfatlarını həmin ərazilərə köçürməyə daha çox maraq göstərirlər. Bu məsələdə dövlət dəstəyi də onlara əlavə stimul yaradır. Məhz bunun nəticəsidir ki, son illər təsərrüfat sahibləri arı ailələrini Qarabağ və Şərqi Zəngəzur iqtisadi rayonlarının ərazilərinə köçürürlər.
Bu ilin yaylaq mövsümündə isə işğaldan azad edilmiş ərazilərdə, təxminən, 42 mindən çox arı ailəsi yerləşdirilib. Bunu “Azərbaycan Arıçılar Assosiasiyası” İctimai Birliyinin İdarə Heyətinin sədri Bədrəddin Həsrətov deyib. Onun sözlərinə görə, arı ailələri, əsasən, Kəlbəcər, Laçın, Zəngilan, Qubadlı və Xocavənd rayonlarının ərazilərinəə köçürülüb. Gələcəkdə isə həmin ərazilərdə 300 min arı ailəsinin yerləşdiriləcəyinin nəzərdə tutulduğunu vurğulayan birlik sədri deyib ki, bu ilin yağıntılı keçməsinə baxmayaraq, ölkə üzrə 8 min ton bal süzümü gözlənilir.