Azərbaycanın dağ-mədən sənayesində səmərəli fəaliyyəti ilə diqqətçəkən “AzerGold” qeyri neft-qaz sektorunun ümumdaxili məhsulda çəkisinin artırılması, ölkəmizin ixrac potensialının yüksəldilməsi istiqamətində fəaliyyətini uğurla davam etdirir.
Bu sözləri “AzerGold” QSC-nin İdarə Heyətinin sədri Zakir İbrahimov İçərişəhərdə Azərbaycanda zərgərlik sənəti və numizmatika nümunələrinə həsr edilən “Xəzinə” muzey ekspozisiyasının açılış mərasimində çıxış edərkən deyib.
Z.İbrahimov sözügedən sektor üzrə ixracatçı dövlət subyektləri sırasında lider mövqelərdə qərarlaşan “AzerGold”un bugünədək 412 min unsiya qızıl (12,8 ton), 785 min unsiya gümüşün (24,4 ton) ixracını həyata keçirdiyini, əlavə olaraq yerli bazarda 15 min unsiya (0,5 ton) qızıl və 100 min unsiya (3,1 ton) gümüş reallaşdırdığını, eyni zamanda, bu əməliyyatlar nəticəsində əldə edilən ümumi gəlirin 1 milyard 232 milyon manatı ötdüyünü diqqətə çatdırıb.
“AzerGold”un ölkəmizin dağ-mədən sənayesinin inkişafı istiqamətində fəaliyyətindən danışan Z.İbrahimov qeyd edib ki, şirkətin hasilat və istehsal fəaliyyəti fonunda yerli icmalarla iş, ətraf mühitin mühafizəsi, sosial-iqtisadi inkişaf kimi vacib sahələrə davamlı töhfələrin verilməsi də əsas məqsədlər sırasına daxildir.
“AzerGold” QSC İdarə Heyəti sədrinin sözlərinə görə, qurum tərəfindən “yaşıl” iqtisadiyyat, rəqəmsal transformasiya, innovativ həllərin tətbiqi, ekosistemin gücləndirilməsi istiqamətində bir sıra addımlar atılır və gələcəkdə də bir sıra yeniliklər nəzərdə tutulur.
XQ
