Son illər ölkə iqtisadiyyatının aparıcı sahələrindən olan kənd təsərrüfatında sürətli inkişaf meyilləri müşahidə olunur. Aqrar sektorda baş verən artım dinamikası bu sahədə beynəlxalq əməkdaşlıq üçün də yaxşı imkanlar yaradır. İndi dünyanın qabaqcıl kənd təsərrüfatı dövlətləri Azərbaycanın aqrar sektoruna, xüsusən də ölkəmizdə aqroparkların yaradılmasına sərmayə qoymağa maraq göstərirlər. Ölkəmizdə kənd təsərrüfatı ilə bağlı keçirilən ənənəvi sərgilər, beynəlxalq konfranslar isə beynəlxalq əməkdaşlıq üçün yaxşı imkanlar yaradır. Bu baxımdan artıq ənənəvi xarakter almış “Caspian Agro” və “InterFood Azerbaijan” sərgiləri xüsusi əhəmiyyət kəsb edir.
Bu il mayın 15-17-də Bakı Ekspo Mərkəzində Azərbaycan Beynəlxalq Kənd Təsərrüfatı “Caspian Agro” və 29-cu Azərbaycan Beynəlxalq Qida Sənayesi “InterFood Azerbaijan” sərgiləri keçiriləcək. Bu barədə sərgilərin təşkilatçısı olan “Caspian Event Organisers” şirkətindən bildirilib. Sayca 17-ci olan budəfəki “Caspian Agro” sərgisi yenidən kənd təsərrüfatı sənayesinin aparıcı iştirakçılarını, yerli və xarici ekspertləri, o cümlədən idxalçılar, ixracatçılar, kənd təsərrüfatı məhsullarının distribütorları, topdan və pərakəndə ticarət nümayəndələri, həmçinin fermerlər də daxil olmaqla minlərlə peşəkar ziyarətçi auditoriyasını bir araya toplayacaq. Sərgi iştirakçıları arasında Azərbaycanla yanaşı, ABŞ, Almaniya, Belarus, Belçika, Cənubi Koreya, Çexiya, Çin, Estoniya, Finlandiya, Fransa, Gürcüstan, İsrail, İtaliya, Latviya, Niderland, Rusiya Federasiyası, Serbiya,Türkiyə və şirkətləri də yer alacaq.
Üç gün davam edəcək “Caspian Agro”nun əsas bölmələrinə kənd təsərrüfatı texnikası, kənd təsərrüfatı obyektləri və avadanlıqları, suvarma sistemi, qablaşdırma, kənd təsərrüfatında innovasiya texnologiyaları, heyvandarlıq və quşçuluq, istixana, yemlər, baytarlıq, bitkiçilik, gübrə, meyvə və tərəvəzlərin yetişdirilməsi daxildir.
Qeyd etdiyimiz kimi, “Caspian Agro” ilə paralel olaraq, Xəzər regionunda qida sənayesi nümayəndələrinin əsas görüş yeri olan 29-cu Azərbaycan Beynəlxalq Qida Sənayesi Sərgisi–“InterFood Azerbaijan” təşkil ediləcək. Sərgidə Azərbaycanla yanaşı, Belarus, Çin, Hindistan, İran, İtaliya, Polşa, Rusiya Federasiyası, Şri-Lanka, Tayland, Türkmənistan, Türkiyə və Venesueladan olan şirkətlər təmsil olunacaq.
Məlumat üçün bildirək ki, “InterFood Azerbaijan” sərgi iştirakçılarının məhsullarının real satışını həyata keçirdikləri, öz şirkətləri üçün distribütorlar və nümayəndələr tapdıqları əlverişli fürsət məkanıdır. Vahid platformada dondurulmuş qidalar və yarımfabrikatlar, qənnadı və un məhsulları, konservləşdirilmiş qidalar, ət məmulatları, süd məmulatları, meyvə-tərəvəzlər, yağ məhsulları, şirələr, çay, sağlam qidalar, eləcə də meyvə-tərəvəz emalı üçün avadanlıqlar, paketlər və bir sıra digər məhsullar təqdim olunacaq.
Sərgidə ilk dəfə olaraq “Agro Hackathon” müsabiqəsi də keçiriləcək. Sözügedən müsabiqədə proqram tərtibatçıları, interfeys dizaynerləri və kompüter proqramçılarından təşkil olunan komandalar bir araya gələrək kənd təsərrüfatı sahəsinə aid texnoloji həllər tapacaq və yeni layihələr ərsəyə gətirəcəklər. Qalib komandalar pul mükafatı və digər qiymətli hədiyyələrlə mükafatlandırılacaqlar.
Ölkəmizdə bütün sahələrdə olduğu kimi, kənd təsərrüfatında da innovasiyaların və müasir texnologiyaların tətbiqi dövlət tərəfindən dəstəklənir. Kənd təsərrüfatının intensiv inkişafı, həm də aqrar sektorda innovasiyaların tətbiqindən birbaşa asılıdır. Aqrar sektorun bütün sahələrində innovasiyalardan istifadə günümüzün çağırışı olduğundan sərgilər kənd təsərrüfatı məhsullarının istehsalçılarına bu innovativ yeniliklərlə əyani tanış olmağa imkan verir. Bu baxımdan “Caspian Agro” və “InterFood Azerbaijan” sərgilərində KOBİA-nın dəstəyi ilə qida sənayesi və kənd təsərrüfatı sahələrində fəaliyyət göstərən mikro və kiçik sahibkarlıq subyektləri də öz məhsul və xidmətlərini təqdim etmək imkanı qazanacaqlar. Bununla yanaşı, sərgi çərçivəsində kənd təsərrüfatında istifadə olunan texnikalar da nümayiş etdiriləcək.
Göründüyü kimi, Azərbaycanda bu tip sərgilərin keçirilməsi kənd təsərrüfatı sahəsində beynəlxalq əməkdaşlığın genişləndirilməsi ilə yanaşı, müasir texnika və texnologiyaların, eləcə də qabaqcıl təcrübənin ölkəmizə gətirilməsinə imkan yaradır.
Yeri gəlmişkən, ölkə iqtisadiyyatının mühüm sahələrindən sayılan aqrar sektorun inkişafına dövlət dəstəyi ildən-ilə artır. Artıq uzun illərdir ki, bu sahədə fəaliyyət göstərən iş adamlarına strateji məhsulların yetişdirilməsinə üçün subsidiyalar verilir, bir sıra vergi güzəştləri tətbiq olunur. Elə Azərbaycan Respublikasının 2022–2026-cı illərdə sosial-iqtisadi inkişaf strategiyasında da kənd təsərrüfatında müasir texnologiyaların tətbiqi ilə məhsuldarlığın artırılması, bu sahədə yeni iş yerlərinin yaradılması prioritet istiqamət kimi müəyyənləşdirilib.
Ölkəmizin kənd təsərrüfatı sahəsində potensialı isə olduqca yüksəkdir. Hazırda bu sahədə mövcud imkanların tam səfərbər edilməsi, eləcə də işğaldan azad edilmiş torpaqlarımızın əkin dövriyyəsinə cəlb olunması, bu ərazilərdə heyvandarlığın dirçəldilməsi istiqamətində görülən işlər müsbət nəticələr verir. Bu baxımdan Azərbaycanın aqrar sektorunda müşahidə olunan inkişaf meyilləri 2023-cü ildə də davam edib. Dövlət Statistika Komitəsinin məlumatına görə, bu ilin yanvar ayı ərzində kənd təsərrüfatı məhsullarının ümumi istehsal həcmi ötən ilin müvafiq dövrü ilə müqayisədə 1,2 faiz artıb. Hesabat dövründə kənd təsərrüfatı məhsullarının ümumi istehsal həcminin dəyəri faktiki qiymətlərlə 491,2 milyon manat təşkil edib. Bunun da 468,5 milyon manatı və ya 95,4 faizi heyvandarlıq, 22,7 milyon manatı və ya 4,6 faizi isə bitkiçilik sahələrinin payına düşüb. Bütövlükdə isə, ilin ilk ayında kənd təsərrüfatı, meşə və balıqçılıq sahəsində yaradılan əlavə dəyərin ümumi daxili məhsulda payı 2,9 faiz təşkil edib.
Bununla yanaşı, cari ilin yanvar ayında Azərbaycandan dünya bazarına 70 milyon ABŞ dolları həcmində kənd təsərrüfatı məhsulları ixrac olunub. Aqrar Tədqiqatlar Mərkəzininin məlumatına görə, kənd təsərrüfatı məhsulları ixracının həcmi ötən ilin müvafiq dövrü ilə müqayisədə dəyər ifadəsində 12,1 faiz artıb.
Mirbağır YAQUBZADƏ
XQ
