“AzerGold” Qapalı Səhmdar Cəmiyyəti (QSC) Ekologiya və Təbii Sərvətlər Nazirliyi tərəfindən “Korporativ sosial məsuliyyət çərçivəsində ətraf mühit layihələrinə dəstək olan ən yaxşı tərəfdaş” nominasiyası üzrə təltif edilib. 

Ekologiya və Təbii Sərvətlər naziri Muxtar Babayev tərəfindən təqdim olunan nominasiyanı “AzerGold” QSC adından qurumun idarə heyəti sədrinin müavini, Korporativ Sosial Məsuliyyət Komitəsinin sədri Xəyyam Fərzəliyev qəbul edib.

Təqdimat mərasimində, həmçinin ət­raf mühitin sağlamlaşdırılması, biomüxtə­liflik və ekosistemin bərpasına önəm verən, bu istiqamətdə layihələr həyata keçirən, ekoloji maarifləndirmə sahəsində təşəbbüskarlıq göstərən digər sahibkarlıq subyektləri və qeyri-hökumət təşkilatları təltif edilib.

Qeyd edək ki, “AzerGold” QSC dağ-mədən sahəsində həyata keçirdiyi fəaliyyəti ilə ölkəmizin qeyri-neft sekto­runda aparıcı yerlərdən birini tutan əsas ixracatçı dövlət şirkətlərindən biri kimi iqtisadi inkişafa töhfə verməklə yanaşı, məsuliyyət zonalarında dayanıqlı inkişaf məqsədlərini də daim diqqətdə saxlayır, ətraf mühitin mühafizəsi tədbirlərinə ardı­cıl və sistemli dəstək göstərir.

Xatırladaq ki, ötən il səhmdar cəmiy­yəti tərəfindən Daşkəsən rayonunun əra­zisində bitən, adları “Qırmızı kitab”a daxil edilmiş nadir, nəsli kəsilmək təhlükəsində olan bitki növlərinin çoxaldılması, onların tarixən yetişdiyi ərazilərə reintroduksiyası layihəsi icra edilib. 2021-ci ildən icrası­na başlanılan ekoloji layihə çərçivəsində Daşkəsən rayonunda yerləşən “Çovdar” qızıl mədəni ətrafındakı dağlardan nəsli kəsilmək təhlükəsində olan bitkilər aşkar­lanaraq toxumları yığılıb.

Ötən bir il ərzində həmin toxumların çeşidlənməsi və müvafiq dərman va­sitələri ilə qurudulması həyata keçirilərək təcrübə sahəsində yetişdirilib. Bunun da nəticəsində “Rosa zangezura Jaros­ch.” (Zəngəzur itburnusu), “Rosa nisami Sosn.” (Nizami itburnusu) və digər na­dir bitkilərin tarixən yetişdiyi ərazilərdə çoxaldılması həyata keçirilib. 

Yeri gəlmişkən, nadir bitkilərin müha­fizəsi tədbirlərinə dair məlumatlar ötən il işıq üzü görmüş Azərbaycan Respub­likasının “Qırmızı kitabı”nın yeni – 3-cü nəşrinə daxil edilib. Eyni zamanda, “Azer­Gold” QSC ötən il hasilat bölgələrində reallaşdırdığı ağacəkmə, yaşıllaşdırma və çaykənarı təmizlik aksiyaları ilə ətraf mühitin mühafizəsi tədbirlərinə önəmli töhfələr verib. 

Məlum olduğu kimi, Azərbaycan Res­publikasının Prezidenti İlham Əliyevin 2023-cü il dekabrın 25-də imzaladığı sərəncamla 2024-cü il ölkəmizdə “Yaşıl dünya naminə həmrəylik ili” elan edilib. Sözügedən sənədə əsasən, Azərbay­canın 2030-cu ilə qədər sosial-iqtisadi inkişafa dair beş milli prioritetindən biri “Təmiz ətraf mühit və yaşıl artım ölkəsi” kimi müəyyən edilib. Həmin prioritetə uy­ğun olaraq hazırda ölkədə ətraf mühitin sağlamlaşdırılması, yaşıllıqların bərpası və artırılması, su ehtiyatlarından və da­yanıqlı enerji mənbələrindən səmərəli istifadənin təmin edilməsi istiqamətində işlər aparılır. 

Ətraf mühitin və ekoloji tarazlığın qo­runmasını fəaliyyətinin prioritet istiqamət­lərindən biri kimi müəyyənləşdirən “Azer­Gold” Qapalı Səhmdar Cəmiyyəti də “Yaşıl dünya naminə həmrəylik ili”nə mü­hüm töhfələr verməyi planlaşdırır. Geolo­ji-kəşfiyyatla bağlı tədqiqatlarda innovativ texnologiyaların tətbiqinə üstünlük verən qurumun 2023-2024-cü illər üzrə hazır­ladığı strategiyaya uyğun olaraq ötən il Daşkəsən, Göygöl, Balakən, Kəlbəcər, eləcə də Naxçıvan Muxtar Respublikası­nın Culfa rayonunda yerləşən sahələrdə aktiv geofiziki və geoloji tədqiqat işləri həyata keçirilib. Tədqiqat sahələrində perspektivli filizləşmə zonalarının müəy­yənləşdirilməsi üçün axtarış-qiymətlən­dirmə işlərinin bu il də davam etdirilməsi nəzərdə tutulub.

Eyni zamanda, Azərbaycan Respub­likası Prezidentinin 22 iyun 2023-cü il tarixli Sərəncamına uyğun olaraq “Azer­Gold” QSC-yə dövlət sifarişi əsasında 2023-2024-cü illər ərzində ölkədə ümu­mi geoloji axtarış işlərinin bir hissəsinin icra edilməsi tapşırılıb. Bu məqsədlə Daşkəsən, Göygöl, Kəlbəcər rayonları, eləcə də Naxçıvan Muxtar Respublika­sının Culfa rayonu ilə yanaşı, Goranboy, Ordubad və Şahbuz rayonlarında da ge­oloji tədqiqatların icrası nəzərdə tutulub. Sözügedən ərazilərdə qısa zamanda ilkin tədqiqat nəticələri əldə etmək üçün bu ildən innovativ texnologiyaların geniş tətbiqinə başlanılır. Belə ki, cari ildə tə­dqiqat işlərində qeyri-invaziv hiperspekt­ral peyk görüntülərinin çəkilişləri davam etdiriləcək, eləcə də helikopter və dronlar vasitəsilə aeroelektromaqnetik tədqiqat­lar aparılacaq. Bu tədqiqat metodları yer səthində axtarış-qiymətləndirmə işlərinin növbəti mərhələsi üzrə perspektivli tə­dqiqat sahələrinin müəyyənləşdirilmə­sinə, beləliklə də, xeyli vəsait tələb edən buruqqazma işlərinin daha kiçik arealı əhatə edən koordinatlar üzrə aparılması­na imkan verəcək.

Dövlət başçısının məlum sərənca­mında işğaldan azad edilmiş Qarabağ və Şərqi Zəngəzurda həyata keçirilən genişmiqyaslı bərpa və yenidənqurma prosesində ətraf mühitin qorunması pri­orit məsələ kimi müəyyənləşdirilib. Fəa­liyyətə başladığı dövrdən Qarabağ və Şərqi Zəngəzurda qanunsuz istismar faktlarının araşdırılmasına xüsusi diqqət ayıran “AzerGold” QSC bu istiqamətdə fəaliyyətini İqtisadiyyat Nazirliyi yanında Əmlak Məsələləri Dövlət Xidməti ilə birgə əməkdaşlıq şəraitində həyata keçirir.

2022-ci ildən Kəlbəcər rayonunun in­zibati ərazisində yerləşən “Tutxun” nəcib metal təzahürləri sahəsində mərhələli kəşfiyyat-axtarış işlərinə başlayan şirkət 2023-cü ilin sonuna qədər minalardan təmizlənmiş 57 kvadratkilometr ərazidə geoloji axtarış işləri həyata keçirib. “Yaşıl dünya naminə həmrəylik ili”ndə isə daha 32 kvadratkilometr sahənin geoloji axta­rış işləri üçün ayrılması nəzərdə tutulub. 

Bundan əlavə, ölkə Prezidentinin 16 noyabr 2022-ci il tarixli Sərəncamı ilə təs­diq edilən “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”na uy­ğun olaraq QSC-nin öhdəliyinə mineral xammal ehtiyatlarının monitorinqi, təftişi, axtarışı, qiymətləndirilməsi kimi bir sıra vacib tapşırıqlar qoyulub. “AzerGold” 2022-2026-cı illəri əhatə edən Dövlət Proqramı çərçivəsində Qarabağ və Şərqi Zəngəzurun mövcud təbii sərvətlərindən Azərbaycan xalqının mənafeyi naminə is­tifadə edilməsi istiqamətində Azərbaycan dövlətinin yürütdüyü siyasətə dəstəyini davam etdirir.

Mirbağır YAQUBZADƏ
XQ