Son illər regionun gəmi istehsal edən dövləti kimi tanınan Azərbaycanın bu sahədə uğurları getdikcə artır. Təqribən 10 il əvvəl istifadəyə verilmiş Bakı Gəmiqayırma Zavodunda indi müxtəlif təyinatlı su nəqliyyatı vasitələrinin inşası ilə yanaşı, istismarda olan gəmilərin təmiri də həyata keçirilir. Müəssisənin ötən müddətdə qazandığı uğurlar xarici ölkələrin də diqqətini cəlb edib. Bu səbəbdən də zavodun beynəlxalq sifarişləri getdikcə artır.
“Azərbaycan Xəzər Dəniz Gəmiçiliyi” Qapalı Səhmdar Cəmiyyəti (ASCO) Müşahidə Şurasının qəbul etdiyi “Gəmiçiliyin 2022-2030-cu illəri əhatə edən Strateji İnkişaf Planı”na uyğun olaraq neft-qaz sənayesində göstərilən dəniz nəqliyyatı xidmətlərinin keyfiyyətinin artırılması, o cümlədən donanmanın yenilənməsi işləri də diqqətdə saxlanılır. Ötən müddətdə Azərbaycan Dövlət Neft Şirkətinin (SOCAR) dəstəyi ilə bu istiqamətdə mühüm addımlar atılıb, dənizdə neft-qaz hasilatında işləmək üçün nəzərdə tutulan müxtəlif tipli gəmilər alınaraq müvəffəqiyyətlə istismara verilib.
ASCO-dan verilən məlumata görə, SOCAR-la uğurlu əməkdaşlığın davamı olaraq yaxın illərdə 3-ü sərnişin və 4-ü dalğıc gəmisi olmaqla, ümumilikdə, 7 yeni gəminin tikintisi barədə qərar verilib. Razılaşmaya əsasən, bu gəmilərin inşası Bakı Gəmiqayırma Zavodunda (BGZ) həyata keçiriləcək. Artıq yeni gəmilərdən 4-nün tikintisinə dair ASCO ilə sözügedən müəssisə arasında müqavilə imzalanıb. Müqaviləyə əsasən, Bakı Gəmiqayırma Zavodu 18-24 ay ərzində ASCO-nun sifarişinə uyğun olaraq hər biri 50 nəfər tutuma malik 3 ədəd sərnişin və dənizin 60 metr dərinliyində işləmək üçün nəzərdə tutulan 1 ədəd hibrid mühərrikli dalğıc gəmisini inşa edərək təhvil verəcək.
Beynəlxalq standartların tələblərinə uyğun tikiləcək gəmilər geniş texniki imkanlara malik olacaq və ölkəmizin neft-qaz hasilatı istiqamətində görülən işlərdə dəniz nəqliyyatı xidmətinin keyfiyyətinin daha da artırılmasında mühüm rol oynayacaq.
Yeni gəmilərin tikintisi ilə bağlı keçirilən imzalanma mərasimində bildirilib ki, sərnişin gəmiləri aparıcı dizayn şirkəti tərəfindən layihələndirilib. Dalğıc gəmisinin inşası isə “ASCO Mühəndislik” MMC-nin təqdim etdiyi layihə əsasında həyata keçiriləcək və bu gəmi Xəzər dənizində üzən ilk hibrid mühərrikli dalğıc gəmisi olacaq. ASCO-nun ekoloji siyasətinə, eləcə də Beynəlxalq Dənizçilik Təşkilatının və bir sıra digər təsnifat cəmiyyətlərinin emissiyaların azaldılması ilə bağlı tələblərinə uyğun inşa ediləcək bu gəmi, həm də Prezident İlham Əliyevin elan etdiyi “Yaşıl dünya naminə həmrəylik ili”nə mühüm töhfə verəcək.
Yeri gəlmişkən, Bakı Gəmiqayırma Zavodu Xəzər dənizi hövzəsində fəaliyyət göstərən bu tip ən böyük müəssisədir. Zavodun tikintisinə 2010-cu ilin mart ayında başlanılıb. Müəssisənin inşası və istismarı işlərinin həyata keçirilməsi məqsədilə Azərbaycan Dövlət Neft Şirkəti, Azərbaycan İnvestisiya Şirkəti (AİŞ) və Sinqapurun “Keppel Offshore & Marine” şirkəti tərəfindən “Bakı Gəmiqayırma Zavodu” Məhdud Məsuliyyətli Cəmiyyəti birgə müəssisəsi yaradılıb. 2010-cu il dekabrın 10-da təsisçilər arasında imzalanmış razılaşmaya əsasən, SOCAR, AİŞ və “Keppel” şirkəti zavodun nizamnamə kapitalında müvafiq olaraq 65 faiz, 25 faiz və 10 faiz pay əldə ediblər.
“Azərbaycan İnvestisiya Şirkəti”, SOCAR və Sinqapurun “Keppel” şirkətinin birgə fəaliyyətinin nəticəsi olan müəssisə 2013-cü ilin sonlarında istifadəyə verilib. Azərbaycan hökuməti tərəfində ayrılmış 470 milyon dollar vəsait hesabına istismara verilən zavodun istehsal gücü ildə 25 min ton metal konstruksiya təşkil edir. Bu da il ərzində 4 ədəd 15 min ton yükgötürmə qabiliyyətinə malik tanker və eyni sayda təchizat gəmisinin istehsalına imkan yaradır.
Bakı Gəmiqayırma Zavodunun ilk sifarişi isə “Caspian Drilling Company LTD” tərəfindən verilən yarımqazma qurğusu – DSS 38M olub. Qurğunun pantonunun göyərtəsi, eyni zamanda, yuxarı göyərtə məhz burada hazırlanıb. Bütövlükdə isə, ötən 10 il ərzində burada 12 yeni gəmi inşa olunub. Müəssisənin istehsalı olan gəmilər hazırda təkcə Xəzərdə deyil, həm də Qara dənizin sularında üzür.
ASCO-nun sifarişi ilə “Bakı Gəmiqayırma Zavodu” MMC və “Baku Shipyard” MMC-də inşa olunan ilk milli “Ro-Pax” tipli “Azərbaycan” gəmi-bərəsi istismara verildiyi ötən 3 il ərzində uğurlu fəaliyyəti ilə seçilib. Britaniya Kral Dəniz Mühəndisləri Cəmiyyətinin “Significant Ship 2021” reytinqinə əsasən, dünyanın ən yaxşı 50 dəniz nəqliyyatı siyahısına daxil edilmiş bu gəmi-bərə ilə ötən müddətdə həyata keçirilmiş çoxsaylı reyslərlə müxtəlif təyinatlı yüklər daşınıb.
Zavodda neft məhsulları daşıyan iri həcmli tankerlərin istehsalı da həyata keçirilir. “Laçın”, “Kəlbəcər” və “Akademik Xoşbəxt Yusifzadə” tankerləri müəssisənin son illər reallaşdırdığı mühüm layihələr kimi diqqət çəkir. Əvvəlki 2 tankerdən fərqli olaraq “Akademik Xoşbəxt Yusifzadə” ilə həm neft, həm də kimyəvi məhsulların daşınması mümkündür.
Ölkəmizdə ilk dəfə olaraq dibdərinləşdirən gəminin istehsalı da məhz burada həyata keçiriləcək. Məlum olduğu kimi, ötən ilin iyun ayında Qaradağ Sənaye Parkının rezidenti “Bakı Gəmiqayırma Zavodu” MMC, “Bakı Beynəlxalq Dəniz Ticarət Limanı” QSC və Niderlandın “Damen Shipyards Gorinchem B.V.” şirkəti arasında üçtərəfli əməkdaşlığa dair saziş imzalanıb. Sənədə əsasən, Bakı Gəmiqayırma Zavodunda Niderland şirkəti ilə birgə istehsal olunacaq dibdərinləşdirən gəmi Xəzər dənizinin səviyyəsinin aşağı düşməsi nəticəsində limanlarda yaranan maneələrin aradan qaldırılmasına kömək edəcək.
Hazırda istehsal prosesində metalkəsmə, profiləymə, lövhəəymə, 3D borukəsmə rəqəmsal avadanlığı kimi müasir texnoloji vasitələrdən istifadə olunur. Eyni zamanda, zavodda il ərzində 80-100 ədəd müxtəlif təyinatlı gəminin təmirini həyata keçirmək məqsədilə yüksək texnoloji şərait yaradılıb. Məhz bunun nəticəsidir ki, ötən müddətdə müəssisədə 180-ə yaxın tərsanə təmiri və digər işlər həyata keçirilib.
Göründüyü kimi, Bakı Gəmiqayırma Zavodunun ölkəmiz üçün iqtisadi əhəmiyyəti olduqca yüksəkdir. Hər şeydən əvvəl qeyd etmək lazımdır ki, müəssisə Azərbaycanın gəmiçilik sahəsində idxaldan asılılığı aradan qaldırmaqla yanaşı, Xəzər donanmasını müasirləşdirməyə də mühüm töhfələr verir.
Gələcəkdə Xəzər dənizindəki yükdaşımaların həcminin artırılması nəzərə alınaraq daha irihəcmli tankerlərə ehtiyac olduqda zavodda 60-70 min ton yükgötürmə qabiliyyətinə malik tankerlərin inşası da həyata keçirilə bilər. Hazırda müəssisədə 1200 nəfər çalışır ki, bunun da, demək olar ki, hamısı yerli vətəndaşlardır.
Mirbağır YAQUBZADƏ
XQ