İqtisadiyyat Nazirliyinin məlumatına əsasən, ötən il “Azərbaycan İnvestisiya Şirkəti”ndə (AİŞ) 109 yeni investisiya layihəsinə baxılaraq müvafiq təhlillər aparılıb.
Məlumatda, eyni zamanda, bildirilir ki, hesabat ilində ümumi investisiya dəyəri 560 milyon manat təşkil edən 8 layihə AİŞ-in Müşahidə Şurası tərəfindən təsdiqlənib. Sözügedən layihələrdə AİŞ-in iştirak payı 42 milyon manat məbləğində nəzərdə tutulub. Layihələrin icrası nəticəsində yeni istehsal sahələrinin yaradılması və 600 nəfərin daimi işlə təmin olunması planlaşdırılıb.
Hazırda AİŞ xarici və yerli tərəfdaşlarla birlikdə müxtəlif sektorları əhatə edən ümumi investisiya dəyəri 2,7 milyard dollara yaxın 24 layihənin təhlilini aparır. Bu layihələr müxtəlif sənaye sahələrini, o cümlədən yaşıl və alternativ enerji, qida sənayesi, əczaçılıq, kimya sahələrini əhatə edir.
AİŞ 2023-cü ildə Azərbaycan – Özbəkistan İnvestisiya Fondunun yaradılmasında da fəal iştirak edib. Bununla bağlı müvafiq saziş 24 fevral 2023-cü il tarixində Daşkənd şəhərində imzalanıb və həmin ilin iyulun 20-də qüvvəyə minib. Bundan başqa, “Azərbaycan – Özbəkistan İnvestisiya Şirkəti”nin yaradılması haqqında Saziş 18 iyul 2023-cü il tarixində Şuşa şəhərində imzalanıb və ölkə Prezidentinin 14 oktyabr 2023-cü il tarixli sərəncamı ilə təsdiqlənib. Ümumi kapitalı 500 milyon dollar olan həmin şirkət artıq Özbəkistanda qeydiyyatdan keçib.
XQ