İqtisadi İslahatların Təhlili və Kommunikasiya Mərkəzinin hazırladığı “İxrac icmalı”nın yanvar sayına əsasən, 2023-cü ilin yanvar–dekabr ayları ərzində ölkəmizin ümumi ixracı 33,9 milyard dollar, qeyri-neft sektoru üzrə ixrac isə 2022-ci ilin müvafiq dövrü ilə müqayisədə 9,8 faiz artaraq 3,3 milyard dollar təşkil edib.
“İxrac icmalı”na görə, 2023-cü ildə yeyinti məhsulları üzrə ixrac 928 milyon dollara bərabər olub. Həmin dövr ərzində elektrik enerjisinin ixracı 3,3 dəfə, spirtli və spirtsiz içkilərin ixracı 1,9 dəfə, plastmas və ondan hazırlanan məmulatların ixracı 19,3 faiz, qara metallardan məmulatların ixracı 13,3 faiz, meyvə-tərəvəz ixracı isə 8,7 faiz artıb.
Ötən il aqrar və aqrar-sənaye məhsulları üzrə birgə ixracın statistik dəyəri 6,2 faiz artaraq 969 milyon dollara çatıb. Qeyri-neft-qaz ixracının tərkib hissəsində əhəmiyyətli yer tutan bu məhsulların yaratdığı dəyər ötən illə müqayisədə 3,2 faiz artaraq 201 milyon dollar təşkil edib.
2023-cü ilin dekabr ayının qeyri-neft ixracı 3,8 faiz artaraq 314 milyon dollar olub. Yeyinti məhsulları üzrə ixrac isə 0,9 faiz artımla 107 milyon dollar, qeyri-yeyinti məhsulları üzrə ixrac isə 5,4 faiz artımla 208 milyon dollar təşkil edib.
XQ