Noyabrın 30-da Birləşmiş Ərəb Əmirliklərinin Dubay şəhərində BMT-nin İqlim Dəyişikliyi üzrə Çərçivə Konvensiyasının (COP28) 28-ci tərəflər konfransı öz işinə başlayıb. Tədbirdə 100-dən çox dövlət və hökumət başçısı, on minlərlə yaxın nümayəndə iştirak edir.
Azərbaycan COP28-də böyük nümayəndə heyəti ilə təmsil olunur. Bu da tədbirdə ölkəmizin ekoloji cəhətdən təmiz və enerjiyə qənaət edən “yaşıl” texnologiyalardan istifadə perspektivlərini müzakirə etmək imkanı yaradır. Onu da qeyd edək ki, Azərbaycan ilk dəfə olaraq bu il COP28 sərgisində ayrıca pavilyonla təmsil olunur. 254 kvadratmetr sahədə quraşdırılan pavilyonda müxtəlif yerli, regional və beynəlxalq təşkilatlarla birgə tədbirlər və seminarlar keçiriləcək. Eyni zamanda, ölkəmizin iqlim dəyişikliyi ilə mübarizə və onun təsirinin azaldılması istiqamətində gördüyü işləri əks etdirən virtual eksponatlar nümayiş etdiriləcək. Yeri gəlmişkən, dövlətimizin başçısı İlham Əliyevin Birləşmiş Ərəb Əmirliklərinin evsahibliyi ilə keçirilən BMT-nin İqlim Dəyişikliyi üzrə Çərçivə Konvensiyasının Tərəflər Konfransının 28-ci sessiyasında iştirakı tədbirin ölkəmiz üçün mühüm əhəmiyyət daşıdığını sübut edir.
Bütövlükdə isə, dekabrın 12-dək davam edəcək İqlim Dəyişikliyi üzrə Çərçivə Konvensiyasının 28-ci tərəflər konfransında qlobal iqlim dəyişikliyinin nəticələri və istixana qazlarının tullantılarının azaldılması tədbirləri müzakirə ediləcək. Konfransın əsas mövzusu Paris sazişinin məqsədinə – planetdə qlobal temperaturun 2 °C-dən yuxarı qalxmasının qarşısının alınmasına nail olunmasının ilkin qiymətləndirilməsi olacaq.
Xatırladaq ki, BMT-nin İqlim Dəyişikliyi üzrə Çərçivə Konvensiyasının tərəflər konfransı 1995-ci ildən etibarən hər il keçirilir. Konfransın əsas məqsədi dünya ölkələrinin iqlim dəyişikliyi ilə mübarizə sahəsində həyata keçirdikləri tədbirləri qiymətləndirməkdir. Bununla yanaşı, 1990-cı illərin ortalarından başlayaraq İqlim Dəyişikliyi üzrə Çərçivə Konvensiyasının tərəflər konfransı çərçivəsində inkişaf etmiş ölkələrdə atmosferə atılan istixana qazları emissiyalarının məhdudlaşdırılmasına dair hüquqi öhdəlikləri özündə əks etdirən Kioto Protokolu müzakirə olunur. 2015-ci ildə isə iqlim dəyişikliyi ilə mübarizədə ən mühüm beynəlxalq sənəd hesab olunan Paris sazişi qəbul edilib. Artıq 195 ölkə bu sazişə imza atıb. 1995-ci ildə BMT-nin İqlim Dəyişmələri üzrə Çərçivə Konvensiyasına qoşulan Azərbaycan da artıq qlobal iqlim dəyişmələrinin mənfi təsirlərinin yumşaldılması üzrə beynəlxalq səylərə qoşulub. Eyni zamanda, 2016-cı ildə Paris sazişini ratifikasiya edən ölkəmiz “yaşıl keçid” platformasının fəal üzvünə çevrilib.
Bu mühüm beynəlxalq platformanın fəal üzvlərindən sayılan Azərbaycan 2021-ci ildə Qlazqoda keçirilən İqlim Dəyişikliyi üzrə Çərçivə Konvensiyasının Tərəflər Konfransının 26-cı sessiyası zamanı 2050-ci ilə qədər istixana qazı emissiyalarını 1990-cı il səviyyəsi ilə müqayisədə 40 faiz azaltmağa razılaşaraq iqlim dəyişikliyi ilə bağlı təşəbbüslə çıxış edib. Belə ki, bərpaolunan enerji potensialı ilə zəngin olan Azərbaycan Respublikası 2030-cu ilədək istilik effekti yaradan qazların emissiyalarının səviyyəsində 35 faiz azalmanı hədəf kimi götürüb. Bu məqsədlə “Azərbaycan Respublikasının 2022-2026-cı illər üçün sosial-iqtisadi inkişaf strategiyası”nda ölkənin ümumi elektrik enerjisi istehsalında bərpaolunan enerji mənbələrinin payının 2026-cı ilədək 24 faiz, 2030-cu ilədək isə 30 faizə çatdırılması nəzərdə tutulub.
Qarşıya qoyulmuş hədəflərə çatmaq üçün isə Azərbaycanda hərtərəfli imkanlar mövcuddur. Məhz bu səbəbdəndir ki, qlobal enerji və nəqliyyat layihələrinin təşəbbüskarı və fəal iştirakçısı kimi tanınan ölkəmizin bərpaolunan enerji potensialı beynəlxalq səviyyədə olduqca yüksək qiymətləndirilir. Belə ki, respublikamızın bərpaolunan enerji potensialının həcmi, quruda külək və günəş enerjisi nəzərə alınmaqla, 27 qiqavatdan çoxdur. Bundan əlavə, Xəzər dənizinin Azərbaycan sektorunda 157 qiqavat həcmində külək enerjisi potensialı mövcuddur.
Ölkəmizin işğaldan azad edilmiş əraziləri də “yaşıl” sərvətlə zəngindir. Mütəxəssislərin araşdırmalarına görə, Qarabağ və Şərqi Zəngəzurda 4 min meqavatdan artıq günəş və 500 meqavatadək külək enerjisi potensialı mövcuddur. Təsadüfi deyil ki, Azərbaycan Prezidenti İlham Əliyev işğaldan azad edilmiş torpaqlarımızın bərpaolunan enerji potensialını nəzərə alaraq həmin əraziləri “yaşıl enerji" zonası elan edib.
Hazırda ölkəmiz bərpaolunan enerji potensialının hərəkətə gətirilməsində, eləcə də “yaşıl enerji”nin ixracında böyük beynəlxalq dəstəyə malikdir. Etibarlı enerji tərəfdaşı kimi özünü tam təsdiqləyən Azərbaycan, hazırda həm də “yaşıl” layihələrə investisiya yatırmaq üçün cəlbedici ölkələrdən biri sayılır. Hazırda dünyanın aparıcı “yaşıl enerji” şirkətləri ilə bərpaolunan enerji sahəsində fəal əməkdaşlıq edilir. Ötən müddətdə ölkəmizin bərpaolunan enerji potensialının hərəkətə gətirilməsi üçün əcnəbi şirkətlərlə bir sıra saziş və anlaşma memorandumlara imzalanıb. Bu baxımdan Birləşmiş Ərəb Əmirliklərinin “Masdar”, Səudiyyə Ərəbistanının “ACWA Power”, Böyük Britaniyanın BP və Avstraliyanın “Fortescue Future Industries” şirkətləri ilə imzalanmış sənədlər Avropaya enerji təchizatının artırılması baxımından mühüm əhəmiyyət kəsb edir. Bütövlükdə isə, xarici investorlarla imzalanan sənədlərə əsasən, qarşıdakı illərdə Azərbaycanda istehsal ediləcək bərpaolunan enerjinin həcmi 10 qiqavata çatdırılacaq.
Artıq ölkəmiz “yaşıl” əməkdaşlığın ilk uğurlarını qeyd edir. Belə ki, cari ilin oktyabr ayında Birləşmiş Ərəb Əmirliklərinin “Masdar” şirkəti tərəfindən inşa edilmiş 230 meqavat gücündə “Qaradağ” Günəş Elektrik Stansiyası istifadəyə verilib. Bu, Xəzər dənizi və Qafqaz regionunda ən böyük günəş elektrik stansiyasıdır.
Qarşıdakı illərdə isə Azərbaycan bərpaolunan enerji mənbələri sahəsində daha böyük uğurlara imza atmaq əzmindədir. Belə ki, ölkəmiz 2027-ci ilə qədər istehsal olunan resursların 80 faizini ixrac etmək niyyətindədir. Bu məqsədlə yaxın perspektivdə respublikamızda 3 qiqavat külək və 1 qiqavat günəş enerjisi istehsal ediləcəyi nəzərdə turulur. Azərbaycanın əsas “yaşıl bazarı” isə Avropa qitəsində yerləşir. “Yaşıl” sərvətimizi “köhnə qitə”yə çatdırmaq üçün ortada artıq konkret layihə də mövcuddur. Məlum olduğu kimi, ötən il il dekabrın 17-də Azərbaycan, Gürcüstan, Rumıniya və Macarıstan Qafqaz regionundan Avropaya enerji körpüsünün tikintisini nəzərdə tutan strateji tərəfdaşlıq sazişi imzalayıblar. Əldə edilmiş razılaşma çərçivəsində 1000 meqavat gücündə və 1195 kilometr uzunluğunda Qara dəniz sualtı elektrik kabelinin çəkilməsi nəzərdə tutulur. Həmin kabellə Azərbaycanda hasil edilən “yaşıl” elektrik enerjisini Gürcüstan və Qara dəniz vasitəsilə Rumıniyaya çatdırmaq üçün Macarıstana və Avropanın qalan hissəsinə nəql olunacaq.
Mirbağır YAQUBZADƏ
XQ