İqtisadi İslahatların Təhlili və Kommunikasiya Mərkəzi (İİTKM) ilə Pakistan Xarici Əlaqələr Şurasının nümayəndələri arasında Anlaşma Memorandumunun imzalanma mərasimi keçirilib. 

Onlayn görüş zamanı İİTKM-in icraçı direktoru, iqtisadi elmləri doktoru, pro­fessor Vüsal Qasımlı iki ölkə arasında dostluq və qardaşlıq münasibətlərinin əhəmiyyətini xüsusi vurğulayıb. O, qeyd edib ki, bu dövlətlərin beyin mərkəzləri arasında iqtisadi tədqiqatlar sahəsində əməkdaşlığın həyata keçirilməsi müna­sibələrin inkişaf etdirilməsinə töhfə verə­cək. Mərkəzin rəhbəri, həmçinin Azər­baycanda aparılan iqtisadi islahatlar, beynəlxalq reytinqlərdə ölkənin mövqeyi barədə də ətraflı məlumat verib. Bundan başqa, o, İİTKM tərəfindən icra olunan monitorinq və qiymətləndirmə fəaliyyəti, Azexport.az, EnterpriseAzerbaijan.com, Rəqəmsal Ticarət Qovşağı, Azranking.az barədə ətraflı danışıb. 

İcraçı direktor pakistanlı investorların Azərbaycan iqtisadiyyatına maraqlarının böyük olduğunu və xüsusilə işğaldan azad edilmiş ərazilərdə bərpaolunan enerji və dayanıqlı infrastrukturun yara­dılması sahəsində Azərbaycanla əmək­daşlığın daha da genişləndirilməsinin ölkələrin iqtisadi inkişafına öz müsbət töhfəsini verəcəyini qeyd edib. Professor əlavə edib ki, hazırda İslam Əməkdaş­lıq Təşkilatının (İƏT) İslam Ölkələri üzrə Statistik, İqtisadi və Sosial Tədqiqat və Təlim Mərkəzi (SESRIC) ilə “İƏT ölkələ­rinin iqtisadiyyatı” adlı kitabın nəşri üzrə birgə layihə icra olunmaqdadır. V.Qasım­lı Pakistan Xarici Əlaqələr Şurasının tə­dqiqatçılarını bu layihədə iştirak etməyə dəvət edib. 

Görüşdə Pakistan Xarici Əlaqələr Şurasının sədri, səfir Syed Hasan Ha­bib rəhbərlik etdiyi qurumun Azərbay­canla sıx əlaqələrin qurulmasına xüsusi önəm verdiyini və imzalanan Anlaşma Memorandumunun gələcəkdə İİTKM-lə Pakistan Xarici Əlaqələr Şurası arasın­da birgə əməkdaşlıq üçün zəmin rolunu oynayacağını qeyd edib. O, xüsusilə də Pakistan–Azərbaycan ticarət əlaqələrini inkişaf etdirmək üçün birgə tədqiqatlar sahəsində əməkdaşlıqda maraqlı olduq­larını bildirib. 

XQ