Orta Dəhlizlə Şərqdən Qərbə 840 milyard dollarlıq yük daşınacaq
Türkiyənin nəqliyyat və infrastruktur naziri Abdulkadir Uraloğlu mətbuata müsahibəsində ölkəsi ilə Azərbaycan arasında birbaşa dəmir yolu və avtomobil nəqliyyatını reallaşdıracaq Zəngəzur Dəhlizi layihəsinin həyata keçirilməsinin bütün Orta Dəhliz dövlətləri üçün mühüm əhəmiyyət kəsb edəcəyinə inandığını vurğulayıb. Abdulkadir Uraloğlu, eyni zamanda, bu çərçivədə gerçəkləşdiriləcək Qars–Naxçıvan dəmir yolu təşəbbüsünün də bütün Avropanı Naxçıvan üzərindən İran, Azərbaycan, Türkmənistan və Pakistanla birləşdirəcəyini bildirib.
Qardaş ölkə naziri, həmçinin artıq Bakı–Tbilisi–Qars xətti ilə Türkiyədən Avropanın bir çox nöqtəsinə, o cümlədən Qərbdə Bolqarıstan, Macarıstan, Almaniya, Avstriya, Polşa, Rumıniya, Çexiya, Slovakiya, Serbiya və Fransaya, Şərqdə İran, Əfqanıstan və Pakistana, Şimalda Rusiyaya, Asiyada Gürcüstan, Azərbaycan, Özbəkistan, Tacikistan, Qırğızıstan, Türkmənistan, Qazaxıstan və Çinə yük qatarları göndərildiyini, bu gün isə Zəngəzur Dəhlizi ilə yeni beynəlxalq xəttin həyata keçirilməsinin qarşıya önəmli məqsəd kimi qoyulduğunu diqqətə çatdırıb. O, Türkiyədə Prezident Rəcəb Tayyib Ərdoğanın rəhbərliyi ilə dəmiryolu sahəsində yeni dövr başlandığını qeyd edib, polad magistral şəbəkəsinin artıq 14 min kilometrə çatdırılğını bildirib.
Beynəlxalq əhəmiyyətli iqtisadi layihə olan Zəngəzur Dəhlizinin tərkibində əhəmiyyətli yer tutan Qars–İğdır–Aralıq–Dilucu–Sədərək–Naxçıvan–Culfa dəmir yolu xətti sadəcə Türkiyə və Naxçıvanı birləşdirmək məqsədi daşımır. Bu, daha qlobal xarakterə malikdir və Avropa ilə Asiyanın ticarət əlaqələrinin yeni mərhələsini şərtləndirir.
Qeyd edək ki, sözügedən layihənin rəsmiləşdirilməsi tədbirlərinə 2020-ci il fevral ayının 25-də Azərbaycan və Türkiyə respublikaları hökumətləri arasında Anlaşma Memorandumunun imzalanması ilə başlanılıb. Cari il sentyabr ayının 25-də isə Naxçıvan şəhərində prezidentlər İlham Əliyev və Rəcəb Tayyib Ərdoğan tərəfindən “Azərbaycan Respublikası ilə Türkiyə Respublikası arasında Qars–Naxçıvan dəmir yolu layihəsinə dair Niyyət Protokolu” imzalanılıb. Bu layihənin reallaşdırılması istiqamətində üçüncü addım isə iki qardaş ölkə arasında yaxın vaxtlarda müvafiq müqavilənin imzalanması ilə atılacağı nəzərdə tutulub.
Xatırladaq ki, Qars–Naxçıvan dəmir yolu layihəsinin tikintisinə dair texniki-iqtisadi əsaslandırma hesabatı artıq təsdiqlənib. 224 kilometr uzunluğunda və 5 stansiyadan ibarət olacaq dəmir yolunun tikintisinin 5 il müddətində başa çatdırılması planlaşdırılıb.
Ekspertlər tərəfindən Zəngəzur Dəhlizinin açılması ilə Orta Dəhlizin daha da canlanacağı və bu marşrutla il ərzində quru yolla Şərqdən Qərbə 840 milyard dollardan çox məhsul ixrac olunacağı bildirilir. Belə bir imkanın isə Çin və Avropa İttifaqı ölkələrində yüksək dəyərləndirildiyi vurğulanır.
Bu məqamda onu da deyək ki, Orta Dəhlizin vacib elementinə çevrilən Bakı–Tbilisi–Qars dəmir yolu xəttinin imkanlarının genişləndirilməsi üçün Azərbaycan dövlət büdcəsindən 100 milyon dollar vəsait ayrılıb. Həmin vəsaitlə dəmir yolunun illik yükötürmə qabiliyyətinin 1 milyon tondan 5 milyon tona qaldırılacağı və bununla da Orta Dəhliz vasitəsilə daha çox yükün daşınmasına imkan yaranacağı proqnozlaşdırılıb.
Yeri gəlmişkən, ekspertlər bildirirlər ki, Zəngəzur Dəhlizinin istismara buraxılması ilə Azərbaycan ərazisindən illik, təqribən, 35 milyon ton yükün daşınması mümkün olacaq. Ölkəmizin ərazisindən ötən il ərzində daşınan yükün həcmində 30 faizdən çox artımın qeydə alınması da Zəngəzur Dəhlizinə marağı daha da gücləndirib, beynəlxalq yükdaşımalarda respublikamızın mövqeyinə müsbət təsir göstərib.
Beləliklə, “Bir kəmər, bir yol”un Zəngəzur Dəhlizindən keçməsinin reallaşacağı təqdirdə illik xarici ticarət dövriyyəsi 6,3 trliyon dollardan çox olan Çindən Avropaya bir trliyon dollara qədər dəyərində yüklərin ən qısa quru yolla daşınması təmin ediləcək və bu marşrutla daşımalarda vaxtın 3 dəfəyə qədər qısalmasına, investorların qazancının isə 3 dəfəyə qədər artmasına şərait yaranacaq. Təbii ki, Ermənistan da Zəngəzur Zəhlizinin açılmasına əngəl törətməyəcəyi, bu yöndə qeyri-konstruktiv siyasətindən əl çəkəcəyi halda layihədən kifayət qədər faydalanacaq və acınacaqlı durumda olan iqtisadiyyatına əhəmiyyətli töhfə verə biləcək. Bir sözlə, Orta Dəhliz ideyasının həyata keçməsi və Zəngəzur Dəhlizinin fəaliyyətə başlaması Azərbaycana, eləcə də region ölkələrinə iqtisadi səmərə ilə yanaşı, siyasi zəmanət də verəcək.
Samir HEYDƏROV,
iqtisadçı-ekspert
Orta Dəhliz dünya iqtisadiyyatının beynəlxalq nəqliyyat sistemində inqilabi xarakter daşıyan bir marşrutdur. Onun fövqəladə əhəmiyyət daşımasının geopolitik və iqtisadi səbəbləri var. Birincisi, iqtisadi əhəmiyyəti və səmərəsi ilə bağlıdır. Çinlə Avropa arasında göndəriləcək yüklər ənənəvi yoldan tez bir müddətdə mənzil başına çatdırıla bilər. Orta Dəhliz Çin və Avropa arasında üç beynəlxalq nəqliyyat dəhlizindən biridir. Dəhlizin avtomobil yolu ilə uzunluğu 4 min 256 kilometr, dəniz yolu ilə isə 508 kilometrdir. Orta Dəhliz Avropa və Asiya arasında ticarət yolu kimi Şimal Dəhlizinə nisbətən daha qənaətcil və sürətli və 2 min kilometr qısadır.
Bu marşrut vasitəsilə Çin malları 20-25 gün ərzində Avropaya çatır. Çin və Cənub–Şərqi Asiya ölkələrindən Suveyş kanalı ilə malların göndərilməsi isə 35-40 gün çəkir. Bu da nəqliyyat xərclərinin minimallaşdırılması ilə əmtəələrin daha rəqabətqabiliyyətli bir qiymətlə bazara çıxmasını şərtləndirir. Digər tərəfdən, mürəkkəb geopolitik vəziyyətlə əlaqədar Orta Dəhliz ən təhlükəsiz marşrut sayılır. Çinin iqtisadi rəqabətdə ABŞ qarşısında önə çıxmasını təmin edir və türk dövlətlərinin inteqrasiya etməsi halında dünya iqtisadiyyatındakı payını artırmaqla onları bir nüfuz mərkəzinə çevirir.
Belə ki, 2022-ci ildə ABŞ–Çin iqtisadi–ticarət əlaqələri 691 milyard dollar olub. Amma Çin və Avropa Birliyi (AB) arasına ticarət əlaqələri 938 milyard dollar təşkil edib. Göründüyü kimi, Avropa–Çin əlaqələri, ABŞ–Çin iqtisadi əməkdaşlığını üstələməyə başlayır. Bu baxımdan Orta Dəhliz vasitəsi ilə Çin–AB iqtisadi–ticarət əlaqələri artmaqla rəsmi Pekinin dünya liderliyinin önünü aça bilər. Eyni zamanda, türk dövlətlərinin Türk Dövlətləri Təşkilatı daxilində iqtisadi inteqrasiyasına zəmin yaradır, perspektivdə Avropa Birliyi modelli iqtisadi bloka çevrilməsini labüd edir.
Azərbaycan hökuməti bu gün Orta Dəhlizin tam gücü ilə işləməsi istiqamətində çalışır. Amma dəhlizin açılmaması üçün və bunun fonunda türk dövlətlərinin inteqrasiyasına qarşı dünyanın müxtəlif güc mərkəzləri siyasət aparır. Burada müxtəlif təxribat xarakterli addımlardan da söhbət gedir. Prezident İlham Əliyevin rəhbərliyi ilə Orta Dəhlizin tam gücü ilə fəaliyyət göstərəcəyinə isə heç bir şübhə yoxdur.
Vaqif BAYRAMOV
XQ