Şəhərə magistral kəmər çəkilib

Azərbaycan Respublikasının Prezidenti İlham Əliyevin tapşırıqlarına əsasən, Füzuli şəhərində içməli və tullantı su sistemlərinin yaradılması məqsədilə təxirəsalınmaz tədbirlər görülüb. Şəhərin içməli və tullantı su sistemləri yaradılanadək burada məskunlaşan əhalinin, eləcə də dövlət və özəl sektora aid binaların və obyektlərin içməli su ilə təmin edilməsi məqsədilə Azərbaycan Dövlət Su Ehtiyatları Agentliyi tərəfindən layihə həyata keçirilib. 

Ölkəmizin işğaldan azad edilmiş ərazilərində məsələlərin mərkəzləşdiril­miş qaydada həlli ilə bağlı yaradılmış Əlaqələndirmə Qərargahından verilən məlu­mata görə, Füzuli şəhərini iç­məli su ilə təmin etmək üçün Təxirəsalınmaz Tədbirlər Pla­nı hazırlanıb. Plana əsasən, Füzuli şəhərində yeni içməli su təchizatı sistemləri yara­dılanadək mövcud imkanlar­dan istifadə olunması qərara alınıb. Bu məqsədlə 1980-ci illərdə Quruçayın məcrasın­da tikilmiş və işğal dövründə yararsız hala salınmış drenaj sistemləri bərpa edilərək istis­mara qaytarılıb. Eyni zaman­da, su mənbəyində ümumi tutumu 100 kubmetr olan 2 sutoplayıcı rezervuar və na­sos stansiyası inşa edilib. 

Su mənbəyindən Füzuli şəhərinə qədər 630 mm diametrli magistral su kəməri inşa edilib. Magistral kəmər hazırda inşa edilən Füzuli ya­şayış kompleksinin paylayıcı şəbəkəsinə qoşulub və bina­lara suyun verilişi təmin edi­lib. Kompleksdə formalaşan tullantı sularının təmizlənib kənarlaşdırılması məqsədilə təxirəsalınmaz tədbir kimi 4 ədəd modul tipli təmizləyici qurğu quraşdırılıb. Bu qur­ğularda sutka ərzində 600 kubmetr tullantı suları təmiz­lənərək kənarlaşdırılacaq. 

Təxirəsalınmaz tədbirlərlə yanaşı, Füzuli şəhərinin içməli su təchizatı, kanalizasiya və yağış suları sistemlərinin ya­radılması layihəsinin icrası da­vam etdirilir. Prezident İlham Əliyev tərəfindən bu il mayın 5-də təməli qoyulmuş infrast­ruktur 2040-cı ilədək perspek­tiv inkişafı nəzərə alınmaqla Füzuli şəhərində 50 min nəfə­rin tələbatının ödənilməsinə hesablanıb. Layihəyə əsasən, Füzuli şəhərini dayanıqlı və keyfiyyətli içməli su ilə təmin etmək məqsədilə 15 yeni su­bartezian quyusu qazılacaq, şəhər ərazisində ümumi tutu­mu 22 min kubmetr olan 4 su anbarı inşa ediləcək. Su mən­bəyindən Füzuli şəhərinə 10,7 kilometr uzunluğunda ma­gistral su kəmərinin inşasına başlanılıb və kəmərin tikintisi işləri intensiv qaydada davam etdirilir.

Layihəyə əsasən, Füzuli şəhərində 103 kilometr içmə­li, 87 kilometr tullantı və 100 kilometr yağış su şəbəkələri inşa olunacaq. Füzuli şəhə­rində formalaşacaq tullantı sularının ekoloji baxımdan təmizlənib zərərsizləşdirilmə­si məqsədilə məhsuldarlığı sutkada 15 min kubmetr olan tullantı sutəmizləyici qurğusu tikiləcək. 

Eyni zamanda, yaradıla­caq infrastrukturun imkanları hesabına gələcəkdə Füzuli rayonunun Dövlətyarlı və Də­dəli kəndlərinə də içməli su­yun verilməsi nəzərdə tutulur.

M. YAQUBZADƏ, “Xalq qəzeti”