Azərbaycanın strateji müttəfiqi sayılan Macarıstan ölkəmizin Avropa İttifaqında ən etibarlı tərəfdaşlarından biridir. Hazırda bir çox sahələrdə fəal əməkdaşlıq edən ölkələrimiz qarşılıqlı münasibətlərdə və beynəlxalq təşkilatlar çərçivəsində bir-birini daim dəstəkləyir.
Azərbaycan və Macarıstan geniş iqtisadi potensialı olan ölkələrdir. Bu da iqtisadi sahədə fəal əməkdaşlığa geniş imkanlar yaradır. İki ölkə arasında 2014-cü ildə imzalanmış strateji tərəfdaşlıq haqqında Birgə Bəyannamə, habelə iqtisadi sahəni əhatə edən bir sıra digər sənədlər bu sahədə əməkdaşlığın genişlənməsinə mühüm töhfələr verir. Təkcə onu qeyd etmək kifayətdir ki, hazırda Macarıstanın 21 şirkəti Azərbaycanın kənd təsərrüfatı, nəqliyyat, ticarət və xidmət sahələrində fəaliyyət göstərir. Ötən müddətdə Macarıstan Azərbaycana 1,1 milyard ABŞ dolları, Azərbaycan isə Macarıstana 18,1 milyon ABŞ dolları investisiya yatırıb.
İki ölkə arasında əmtəə dövriyyəsinin həcminin qısa zaman kəsiyində əhəmiyyətli dərəcədə artması da əlaqələrin yüksək səviyyədə olmasından xəbər verir. Hazırda Azərbaycan və Macarıstan bir çox sahələrdə, o cümlədən, nəqliyyat, informasiya texnologiyaları, energetika, ticarət, kənd təsərrüfatı sahələrində uğurla əməkdaşlıq edir. Bununla belə, sadalanan sahələrdə əməkdaşlığın daha da genişləndirilməsi üçün imkanlar böyükdür. İşğaldan azad edilmiş ərazilərimizdə aparılan bərpa-quruculuq işlərinə böyük maraq göstərən macar şirkətləri artıq bununla bağlı müvafiq layihələr təqdim edib.
Azərbaycanla Macarıstan arasında yeni biznes təşəbbüslərinin reallaşdırılması üçün də imkanlar genişdir. Bu təşəbbüslər isə yaxın vaxtlarda energetika, sənaye, nəqliyyat, informasiya texnologiyaları, kənd təsərrüfatı, əczaçılıq və ticarət sahələrində əlaqələrin gücləndirilməsinə inamı artırır. Elə ölkəmizdə yaradılmış əlverişli infrastruktur və tətbiq olunan güzəştlər, eyni zamanda, Azərbaycan ərazisindən keçən nəqliyyat dəhlizləri, Bakı Beynəlxalq Dəniz Ticarət Limanı və Ələt Azad İqtisadi Zonasının imkanları macar şirkətlərinin ölkəmizin əlverişli biznes mühitindən yararlanmasına imkan yaradır.
Avqustun 20-də Azərbaycan Respublikasının Prezidenti İlham Əliyevin Macarıstana növbəti işgüzar səfəri iqtisadi münasibətlərin daha da genişləndirilməsi baxımından mühüm əhəmiyyət daşıyır. Həmin gün Budapeştdə dövlətimizin başçısı İlham Əliyevin Macarıstanın Baş naziri Viktor Orbanla görüşü zamanı ölkələrimiz arasında iqtisadi sahədə əlaqələrin gələcək inkişafı ilə bağlı geniş fikir mübadiləsi aparılıb. Söhbət əsnasında Azərbaycan ilə Macarıstan arasında enerji, o cümlədən neft-qaz sahəsində əməkdaşlığın uğurla inkişaf etdiyi qeyd olunub, Azərbaycan qazının Macarıstan bazarına çatdırılmasının əhəmiyyəti vurğulanıb.
Tərəflər qida sənayesi sahəsində Macarıstanın Azərbaycana investisiya qoyuluşu, əczaçılıq sənayesi sahələrində əməkdaşlıqla bağlı əldə olunmuş müsbət dinamikanı yüksək qiymətləndiriblər. Eyni zamanda, Macarıstan aviadaşıyıcısı vasitəsilə Bakı–Budapeşt reyslərinin həyata keçirilməsinin əhəmiyyətinə toxunulub, ümumilikdə, ikitərəfli əlaqələrin inkişafından məmnunluq ifadə olunub.
Dövlətimizin başçısı Azərbaycanın işğaldan azad edilmiş ərazilərində həyata keçirilən bərpa-quruculuq işlərində Macarıstan şirkətlərinin fəaliyyətə başlamasını müsbət addım kimi qiymətləndirərək bu istiqamətdə daha böyük imkanların olduğunu vurğulayıb.
Söhbət zamanı, həmçinin Azərbaycan, Gürcüstan, Rumıniya və Macarıstan hökumətləri arasında “yaşıl enerji” sahəsində strateji tərəfdaşlığa dair Sazişin imzalanmasının əhəmiyyəti, eləcə də Orta Dəhlizlə yükdaşımaların artması vurğulanıb. Bütövlükdə isə, Prezident İlham Əliyevin dost ölkəyə səfəri yüksək səviyyədə olan əlaqələrin inkişafına və qarşılıqlı maraq doğuran sahələrdə əməkdaşlığın daha da gücləndirilməsinə töhfə verəcək.
Təbriz YADİGAROV,
ETN İqtisadiyyat İnstitutunun aparıcı elmi işçisi, dosent
Azərbaycanın dünya ölkələri ilə qarşılıqlı səmərəli iqtisadi münasibətləri sayəsində bu ilin 7 ayında beynəlxalq iqtisadi münasibətlərin 80 faizini təşkil edən xarici ticarət əlaqələri 30 milyard 333 milyon 432 min dollara çatıb. Bu da əvvəlki ilin eyni dövrü ilə müqayisədə 274 milyon 522 min dollar çoxdur. Ticarət əlaqələrinin 51 faizi Avropa İttifaqı ölkələrinin payına düşüb.
Azərbaycan beynəlxalq aləmdə nüfuzunu genişləndirərək investisiya cəlbediciliyini artırmaqla yanaşı, Avropa İttifaqı ölkələri ilə beynəlxalq ticarət əlaqələrini qarşılıqlı əməkdaşlıq çərçivəsində daim inkişaf etdirir. Bu baxımdan son illər ölkəmizin Macarıstanla da ticarət əlaqələri getdikcə genişlənir. Təkcə onu qeyd etmək kifayətdir ki, 2023-cü ilin 7 ayı ərzində Azərbaycandan Macarıstana 1 milyon 556 min 610 dollarlıq mal ixrac olunub ki, bu da əvvəki ilin eyni dövrü ilə müqayisədə 2,1 dəfə çoxdur. Həmin dövrdə Macarıstandan idxal olunan malların statistik dəyəri isə 28 milyon 86 min dollar təşkil edib ki, bu da əvvəlki ilin müvafiq dövrü ilə müqayisədə 18,3 faiz çoxdur. Ümumilikdə isə, Azərbaycanın Avropa məkanı ilə illik ticarət dövriyyəsinin 0,098 faizi Macarıstanın payına düşüb.
Yeri gəlmişkən, 2023-cü il avqustun 21-də də Budapeşt və Bakı arasında imzalanan saziş gələcəkdə Azərbaycan qazının Macarıstana nəqlinin həcminin təqribən 1 milyard kubmetrə çatdırılmasına imkan yaratmaqla yanaşı, ölkələrimiz arasında ticarət əlaqələrinin inkişafında da mühüm rol oynayacaq. Sazişdə də qeyd edildiyi kimi, Macarıstan 2023-cü ilin dördüncü rübündə Azərbaycandan 100 milyon kubmetr qaz almaqla yanaşı, həmçinin anbarlarda 50 milyon kubmetr Azərbaycan qazının saxlanması və siyasi saziş üzrə qaz tədarükünün bir milyard kubmetrə çatdırılması nəzərdə tutulur.
Məlum olduğu kimi, Macarıstanın MVM CEEergy enerji şirkəti ilə Azərbaycanın SOCAR şirkəti arasında 2023-cü ilin sonunadək bu ölkəyə 100 milyon kubmetr qaz tədarük edilməsi haqqında saziş imzalanıb. 2022-ci il dekabrın 17-də isə Prezident İlham Əliyevin təşəbbüsü ilə Buxarestdə Azərbaycan, Macarıstan, Gürcüstan və Rumıniya hökumətləri arasında Qara dənizin dibi ilə sualtı elektrik kabelinin çəkilməsini nəzərdə tutan “yaşıl enerji”nin inkişafı və çatdırılması sahəsində strateji tərəfdaşlıq haqqında sazişə imza atılıb. Bu sənədlərin icrası isə, ilk növbədə, Azərbaycanın Avropa ölkələri, o cümlədən dost Macarıstanla qarşılıqlı əlaqələrin inkişafında müstəsna rol oynayacaq.
Mirbağır YAQUBZADƏ, “Xalq qəzeti”